NASHONNAN UNI, USA (AFP).- Na Gaza nan ta aserkando “un katastròf humano deskomunal” meimei dje konflikto entre Israel i e grupo islamita palestino Hamas, segun e sekretario general di ONU, Antonio Guterres.
“Dilanti wowonan di mundu, e poblashon di Gaza ta biba meimei di un katastròf deskomunal . “Nos no mester bira kara”, segun Guterres a sigui bisa den reunion di Konseho di Seguridat di ONU, na New York.
“Negosiashonnan pisá ta tumando lugá di ámbos banda pa prolongá e echo ku a wanta ku e bombardeo, loke ta duna nos satisfakshon. Pero nos ta kere ku loke ta nesesario mes ta pa stòp ku e guera”, rekordando ku 80% dje poblashon palestino a bandoná nan kas for di kuminsamentu dje guera.
Segun Guterres, “e sistema di kuminda a basha den otro i hamber ta birando hopi mas serio, spesialmente den e parti nort”. Mas aleu el a referí na e “espantoso” situashon sanitario den e sentronan di refugio, loke ta representá “un menasa grave pa salú públiko”.
“E volúmen di yudansa ku ta yega serka e palestinonan den Gaza ainda ta leu for di sufisiente pa satisfasé nesesidatnan di mas di dos mion di persona. “Nos tin ku sigurá nos mes ku e pueblonan dje region finalmente lo tin un horizonte di speransa, avansando di manera desisivo pa yega na un solushon di dos estado, basá riba resolushonnan di Nashonnan Uní i derechinan internashonal, ku Israel i Palestina bibando banda di otro den pas i seguridat”, el a suprayá.
Di su parti, e minister chines di Asuntunan Eksterior, Wang Hi, ku ta presidí e reunion di Konseho di Seguridat, a trese dilanti ku reanudashon dje guera entre Israel i Hamas ta kore riesgo di provoká “un desaster ku lo afektá hinter e region”. Wang Hi a sigui bisa ku China semper a apoyá un solushon di dos estado, un palestino i otro hebreo i e ta spera ku e tregua lo por kondusí ku ta stòp k’e atakenan.
E minister palestino Riyad al-Maliki, a trese dilanti ku su pueblo den e konflikto aki “ta enfrentá un menasa di stòp di eksistí”. “Bosnan no kiboká. Ku tur e kos ku ta papia di destrukshon di Israel, ta Palestina ta e meta den un plan di destrukshon”, segun el a agregá.
Sinembargo, e diplomátiko a agregá: “Israel mester ta konvensí ku ningun forsa na tera lo por saka e palestinonan for di Palestina”.
Pa Israel ta nèt kontrario. E embahador israelí na ONU, Gilad Erdan, a bisa ku “kualke hende ku apoyá pa stòp e guera, bon mirá, ta apoyando pa sigui ku e reino di teror di Hamas den Gaza”.
