MERKA.- Katy Perry ta apelá e sentensia den kua ta akus’é di ‘plagio’ ku e komposishon ‘Dark Horse’. E kantante ku su tim ta di opinion ku nan no a kopia e kansion for di e rapper ‘Flame’.
Na final di luna di yüli 2019, Perry a keda kondená pa ‘plagio’ di e kansion ‘Joyful Noise’, un komposishon di e rapper kristian, Flame. E kansion ‘Dark Horse’ segun e hurado tin demasiado similaridat ku ‘Joyful Noise’.
Hues den e kaso aki a dikta un sentensia obligando e kantante pa paga 2.78 mion dòler na Flame i algun kompositor.
Djárason último e kantante a entregá dokumentonan kaminda e ta indiká ku e ta apelá e sentensia. Den e dokumentonan ku abogadonan di Perry a entregá tin pará ku e similaridat entre e dos kansionnan ta masha chikí i ku tin hopi elemento ku lo por diskutí riba dje ainda. Aserka ta bin ku esnan ku a entregá keho no tin derechi di outor riba e ritmo di e kansion. Un di tres argumento tabata ku esnan ku ta eksigiendo pago no por a demostrá ku e kompositornan di ‘Dark Horse’ tabatin akseso na e komposishon ‘Joyful Noise’ promé ku nan a traha nan komposishon.
E abogadonan di Perry ta pidi e hues pa e seponé e evaluashon di hurado, kuminsá un kaso nobo òf baha e montante di daño di perhuisio ku e rapper ta pidi. Entre esnan kulpabel na plagio huntu ku Perry tin Dr. Luke, Max Martin i Juicy J., tur produktornan dje kansion.
