WILLEMSTAD. – Kaya Kaya a ranka sali ayera ku hopi entusiasmo i bon bishitá. Esaki ta loke ku por dedusí for di e palabranan di Curt, un di e motornan organisadó di Kaya Kaya. Ayera for di 5or di atardi Kaya Kaya a start ku nan “Partners Walk” i ora ku organisadónan a kere ku ayera tabata djaluna i kisas e start lo no haña hopi hende, Curt a splika Extra ku tabata realmente un sorpresa pa a mira kuantu hende tabata interesá den e “Partners Walk”. Esaki ta tur e hendenan ku ta kontribuí ku e “art week” Kaya Kaya. Durante e “Partners Walk” ta mustra nan e área ku tin akitvidat i artenan durante e siman di arte aki.
E edifisio konosí komo di St. Martinus, lo ta e sentro di e diferente artenan. Kaya Kaya a haña e edifisio akí pa fia pa e siman akí nan por eksponé e diferente artenan.
E aña akí, Kaya Kaya tin dos kurator, den persona di Avantia Damberg i Jhomar Loaiza ku a invitá kuater artista lokal pa nan eksponé nan artenan den un eksposishon yamá “Intention”.
Banda di esaki, e kuratornan tabatin un “open call” pa algun artista lokal por haña un podio mas profeshonal pa presentá nan obranan.
E espasionan ku ta será, manera un Kapèl na St. Martinus, ku ta un lugá realmente impreshonante, akinan lo eksponé vários obra.
Durante siman lo bai tin hopi kos ta bai pasa i si tuma e akohida di ayera, por ferwagt riba un Kaya kaya eksitoso ku hopi variashon. Lo bai tin restorantnan ku lo bende nan kumindanan, bar i hopi mas.
