Chaim Durand a terminá e aña aki su estudio komo pilot na Merka. El a terminá nèt ora a surgi henter e situashon di ‘lockdown’ debí na e vírus di Corona. Pero apesar di esaki Chaim e ta ganando su oranan di buelo tiki tiki. Chaim ta un hóben ehèmpel ku a Sali for di un skol di VSBO i a yega asina leu apesar di tantu opstákulo ku el a hañ’é kuné den su kaminda. Perseveransia i perseveransia ta loke Chaim semper  a pone su dilanti.

Chaim ta kòrda ku for di ora e tabata chikitu, asta den pèmper, ora e tende avion e ta wak ariba i mustra ariba. Esei a keda den su mente i e sa ku un dia  e lo bula un avion. El a keda bringa pe apesar di tur opstákulo ku a tira den su kaminda.

 

Opstákulo…

 

E promé opstákulo ta ora el a bai un skol VPCO basta konosí na Kòrsou i ora nan a puntra den klas na e muchanan kiko nan ke bira, Chaim a bisa ku e ke bira pilot, pero nan a keda wak e ku un kara i bisa ku si ta wega e ta hasiendo pasobra di e manera ku e ta bayendo e por bien lubidá i mihó e buska un otro plan. E tabata un hóben di 14 aña a tuma e kos aki hopi personal i el a bira hopi tristu. El a skohe otro sektor ku e no tabata gusta. El a skohe pa ekonomia atministrashon i komersio. E no a gusta i por a mir’é ku su puntonan a kai. E tristesa i depreshon a hal’é abou. El a kita for di e skol ei i a hasi e aña 2 di nobo i na e otro skol si a bai bon. Kabando e skol el Chaim a konosé un persona ku tambe kier a bira pilot. Pero e nivel no tabata Havo ku tabata un di e eksigensianan. Pero tòg e persona ei a bisa ku e ta bai pe. Chaim a mira kon e persona ei a logra, el a kuminsá bula. E kos ei a pone Chaim pensa ku e tambe tabata por. Na 2010 el a pone su meta pa e logra. No tabata fásil pero el a keda determiná pa logra. I despues di tur e tormenta e solo a sali i e regenbog a bin i asina el a hañ’é den e estudio i e aña aki el a kaba apesar di tur e difikultat ku el a pasa aden.

 

Deskriminá…

 

Chaim ta splika ku no tabata su puntonan ku a influensia su estudio pero e nivel di PKL/TKL ku e tabata den dje. E nivel di estudio ei a pone ku el a sintié deskriminá ku e no por logra su meta. Tabata bisa Chaim ku e mester di Havo i VWO pa e por bai pa pilot. E ku tabata hopi yòn e tempu ei a tuma e loke nan tabata bis’é literalmente i a pone su soño un banda. Pero esaki ta Kòrsou ku ta bai e sistema di Hulanda siendo Merka ta sali for di e punto ku e persona tin gana i e tin e habilidat pa hasié, nan ta tum’é i si e kos ei ta pa e, e lo logra sino lo lag’é numa.

 

Balorá estudio…

 

E ta kere ku aki na Kòrsou mester siña balorá for di e estudio di mas abou te ariba. E ta haña ku semper ta pensa ku esnan di Havo ta logra tur kos i AGO no ta logra nada. Esaki tambe ta konta tambe pa PKL i TKL. Semper ta wak e tipo di estudio ei komo esnan mas abou. Chaim ta kere ke tipo di estudionan ei tambe mester haña un chèns. “tantu bal nos ta eksihí Havo, kaminda esun di nivel mas abou ta hasié segun e prosedura”.

 

Merka ta organisá…

 

Siendo na Merka Chaim a bin nota ku tur kos ta otro for di Kòrsou. Na Kòrsou nos konosé kos ta bai skol, mester warda hopi riba tur kos pero na Merka ta bai ta bai. Si na Kòrsou nan bisa 8 di mart 6 or i bo ta yega i nan ta lubidá mes, pero  si ta na Merka wak pa bo tei presente i nan ta yama i konfirmá. Hopi organisá Merka ta.

Pilot den 9 luna…

 

Chaim a keda Merka ménos ku un aña pasobra e training pa pilot ta unu kaminda ta dependé na e persona kon lihé e por kapta e lèsnan. Por ehèmpel Chaim por kapt’e den 9 luna i el a hasié. Pero kisas un otro por hasié un tiki mas ku un aña tambe ta bai asina. Ta dependé e persona su kapasidat i kon lihé e ta progresá. Chaim awor ta kla pa bula avion.

 

Kla pa bula…

 

Despues di su estudio na Merka Chaim ta kla pa bula avion chikitu i tambe por bai tuma pa un aerolínea basta nan ta tuma esnan ku a kaba di studia. Hopi aerolínea ta eksihí pilotonan ku kantidat di ora di buelo. Tin kompania ta eksihí 300 ora so ku mayoria biaha ta esun ku  a kaba di gradua. Poko poko Chaim ta subiendo ku su oranan di buelo. I no ta bèrdat ku bo ta bon si bo ta bula avion grandi. Tur pilot tin e mesun lisensia, tur a siña mesun kos pa siña kaminda nan ta den un aerolínea.

 

Antes e tabata poko nèrvioso den buelo pero awor e ta sigur i ta konfia den su habilidatnan i sa kiko e tin di hasi. Chaim te ainda tin 258 ora i ta sigui akumulá pasobra esei por yud’e pa e yega un kompania ku ta eksihí mas ora di buelo.

Chaim ta wak su mes komo un mucha kibrá i insigur ántes pasobra  nan a bis’é ku e no ta logra. Awor e ta sintié sigur i ta orguyoso di su mes i e sa ku si botin habilidat pa siña algu nobo pa hasié. Mas tempu dediká mas lihé e ta bai. E regla ta pa keda siña i keda práktika pasobra esei ta pone bo logra mas i mas.

 

Buska pa sa kiko bo ke studia…

 

Na e hóbennan ku tin di bai studia den eksterior i ku tin bia no ta skohe e estudio ku el a bai pe, Chaim ta konsehá pa promé ku hende lo ke bai un estudio hasi un poko investigashon i sa kiko e estudio ta. E ku kier  a bula a buska pa sa kiko e mester sa, kiko ta e parti leuk i esun ménos leuk. Tin estudio ta eksihí hopi i sin hende no ke hasi tantu asina i esei por pone e studiante kai afó. Sinembargo e fiansa i debe di estudio ta keda p’esei bo mester sa i ta sigur. Puntra hendenan ku a studia den e direkshon pa mira si echt e gana tei.

 

LAGA UN KOMENTARIO

Please enter your comment!
Please enter your name here