WILLEMSTAD.- Mester tene enkuesta regular den komunidat pa asina midi satisfakshon di pueblo relashoná ku servisio ku ta risibí serka gobièrnu i tambe relashoná ku reformanan gubernamental. E meta mester ta ku ta logra un grado di satisfakshon di entre 90 pa 100 porshento.
Esaki ta un di e metanan ku partido KEM ke logra den un próksimo periodo di gobernashon. Pa e aparato públiko por duna un ‘bon servisio’, mester drecha, mehorá e kondishonnan ku empleadonan públiko ta traha bou di dje, parlamentario pa KEM, Anthony Godett ta indiká. Na su opinion hopi di e espasionan ku empleadonan públiko ta traha aden ta den mal estado i no ta apto pa traha aden.
Tambe, segun Godett ,mester sigui mehorá kondishonnan sekundario di trabou di empleadonan públiko. E pensamentu ta ku un trahadó ku kondishonnan di trabou ta optimal ta produsí mas tantu i duna mihó servisio. Mas aleu e parlamentario ta bisa ku mester oumentá transparensia, alsa nivel di responsabilidat i redusí òf asta eliminá burokrasia den gobernashon.
Pa mehorá servisio mester fortifiká alabes órganonan haltu di estado manera Ombudsman i Kontrolaria General. Den e kuadro akí Godett ta opiná ku mester tin mas rèspèt i tambe sosten pa e funshon di Ombudsman. “Ombudsman konforme lei mester aktua di bèrdat komo mediadó independiente entre e siudadano i gobièrnu.”
Pa loke ta Kontrolaria General e parlamentario ta bisa ku mester ekipá e instansia akí ku mas rekurso pa por kontrolá entrada i salida di plakanan for di kaha di gobièrnu i presentá resultadonan riba un término mas kòrtiku ku aktualmente ta e kaso.
Reino
Godett mas aleu tin un posishon fiho riba relashonnan den Reino. E ta splika ku na 2005 un mayoria di poblashon a vota pa Kòrsou keda forma parti di Reino Hulandes i miéntras ku no bini kambio den esaki mester keda respetá e desishon di mayoria. “Konsekuentemente mester keda konstruí relashonnan sólido i práktiko den Reino tambe.”
Esaki segun Godett mester tuma lugá sin mustra idea di superioridat, sin falta di rèspèt i sin ku ta imponé pensamentu- i posishonnan riba otro. “Esaki mester tuma lugá den bon esfera, ku responsabilidat pa koordiná, ku madures, promové rèspèt pa otro i sòru pa desaroyo na interes di tur pais den Reino.”
Den esaki mantenshon di lasonan entre habitantenan di e diferente paisnan den reino i desaroyo ekonómiko/turístiko pa Godett ta esensial. E ta enfatisá ku mester reina trankilidat bou di partnernan den Reino. Na su opinion minister presidènt di Hulanda mester bishitá e paisnan den Karibe 2 biaha pa aña, p’asina topa ku e promé ministernan i pueblonan di e paisnan.
Tambe Godett ta mustra ku no por sigui rèk kakiña riba défisit demokrátiko den Reino i ku mester solushoná e punto akí den e próksimo periodo di gobernashon. Finalmente e parlamentario ta bisa ku KEM ta hasi su mes fuerte pa eliminá visa pa estranheronan bishitá Kòrsou i ku Kòrsou mester kontinuá i asta hasi mas uso di su entrada den CARICOM.
Foto:
…Anthony Godett…
