PNP traidor di demokrasia
WILLEMSTAD – Pa un partido di e trayektoria manera esun di PNP bende tur su prinsipionan (òrdu, desensia i disiplina) simplemente pa saka probecho for di gobièrnu a kosto di nos libertat, demokrasia i estado di derecho, ta prueba ku e ta un partido inkonfiabel. Ademas e ta mes òf mas kulpabel ku e partido ku e ta uni su mes n’é pa kousa e dañonan aki na Pueblo.
Segun miembro di partido PAR, Luigi Faneyte, aparte di tur e iregularidatnan di mal maneho i te asta aktonan ku ta parse koruptivo den e aktual gobièrnu di MFK/PNP, ta konstatá alabes un tendensia di diktadura i opreshon di parti di ministernan di gobièrnu. “Esaki sostené pa un Parlamento sekuestrá pa un mayoria inepto i diktatorial. Pueblo no ta skohe pa oposishon i koalishon, Pueblo ta skohe pa representantenan di Pueblo, pues tur e 21 parlamentarionan tin e responsabilidat pa defendé interes di Pueblo.”
Korupshon i mal maneho no ta aseptabel. Faneyete ta enfatisá. “Sinembargo trapa prinsipionan di demokrasia (estado di derecho) ta muchu mas peligroso, komo ku esaki ta kibra e resistensia di Pueblo i di gobièrnu kontra kosnan no deseá i ta faboresé netamente mal komportashon.”
E miembro di PAR ta splika mas aleu ku e gobièrnunan di PS i MFK (2010-2012 i 2017) tabata konosí pa ta outókrata, esta ku ta sentralisá poder rondó di 1 solo persona. Ekstremonan grandi tabata ora ku Parlamento di e tempu ei tabata nenga di yama reunion i a fòrsa un mayoria den Parlamento pa tene un reunion ekstraordinario pa baha gobièrnu.
Pero apesar di e desishon demokrátiko parlamentario aki, MFK a nenga di entregá gobernashon di pais i promé minister asta a sera su kurpa den Fòrti. Tabata ku mobilisashon di Pueblo i usando forsa di lei ku a logra na saka nan for di gobernashon.
E di dos gabinete (interino) di MFK bou di promé minister Gilmar Pisas i formá pa minister pa PS, Ruthmilda Larmonie-Cecilia a intentá pa kanselá elekshon yamá. Un biaha mas tabata ku mobilisashon di Pueblo i intervenshon di gobernador ku a fòrsa nan pa organisá elekshon demokrátikamente yamá.
“Nan komportashon ta demostrá kontinuamente ku nan ta un banda kriminal ku ta oprimí Pueblo. Ta mira entre otro den e manera kon nan ta trata ámtenarnan i personanan ku no ta kompartí e mesun ideanan ku nan tin.”
Faneyte ta mustra ku nos sistema di demokrasia parlamentario t’ei netamente pa protehá Pueblo kontra tipo di situashonnan asina. “Esaki ta lokual Pueblo ta pidi i spera tambe di su Parlamento. P’esei tambe nunka un partido ta haña mayoria apsoluto pa goberná.”
Ta solamente ku sosten di otro partido(nan) por tin un aktitut polítiko outokrátiko ku ta oprimí e pueblo. “Nos sa ku partido MFK ta un partido sin ideologia i tin un aktitut di “Cosa Nostra”, pues “Maffia”.
Segun Faneyte ora promé minister Pisas ta referí na parlamentario, Sheldry Osepa i bisa ku den koalishon no por tin oposishon, esei ta netamente un ehèmpel di kon lei di “Maffia” ta funshoná: Tur hende tin ku hasi lokual e lider bisa. “Nos tin komprenshon i ta respetá ku sierto hendenan por a kometé e eror di vota pa MFK i nos no ta tuma nan na malu.”
Pero, Faneyte ta finalisá bisando, esunnan mas konsiente a vota pa otro partidonan a base di e ideologia i prinsipionan ku nan a bende. “Ta p’esei e ta inkonsebibel i inkomprendibel pa un partido manera PNP ku un trayektoria di mas ku 75 aña, ku un ideologia demókrata kristian i ku mester ta madurá, ta bende tur prinsipio a kosto di Pueblo pa ta den gobièrnu ku un grupo di ‘Maffia’.”
Foto:
…Luigi Faneyte…
