Ken lo tuma empresa familiar over i kiko por bai robes?

Deloitte a presentá ‘Succesion Planning’

WILLEMSTAD.-Traspaso di un empresa familiar no ta trata solamente repartishon di akshonnan. Deseonan di e yunan, impuesto, edifisio, tereno i futuro di e empresa tambe ta hunga un papel importante. Hopi empresario ta posponé e kombersashon tokante suseshon. Pero problema por surgi si e famia kuminsá pensa riba traspaso te na último momentu. Esaki a bini dilanti durante di un seshon spesial organisá pa Deloitte, bou di e titulo ‘Succesion Planning’. Presentadónan tabata Liesbeth Mol, Martijn van Rensch i Julian Lopez Ramirez Senior Partner Deloitte Dutch Caribbean.

Plania suseshon, esta kontinuashon den maneho ta sumamente importante pa kontinuidat di empresa òf kualke organisashon. Warda te na último momentu por krea situashonnan difísil. Por tin impuesto pa paga, miéntras ku e famia òf empresa no tin sufisiente plaka disponibel.

Dos heredero por resultá un situashon difísil, kaminda desishonnan importante ta stanka!

Un mayor por disidí di duna kada yu mitar di e empresa. Esaki por parse hustu, pero kada yu por tin otro plan. Un yu por ta traha den e empresa i ke usa e ganashi pa hasi invershon. E otro yu ku no ta traha den e empresa kisas ta preferá pa kobra e dividendo. Si tur dos tin 50 porshento di e akshonnan, desishonnan importante por stanka! P’esei mester aklará e asuntu di antemano: Mayornan mester atendé, papiando ku e herederonan:

• Ken ke traha den e empresa?
• Ken lo dirigí e empresa?
• Ken lo keda solamente komo akshonista?
• Ken por tuma desishonnan importante?
• Kiko lo pasa si e herederonan no por yega na un akuerdo?
• Propiedat balioso, pero tiki plaka disponibel

Un empresa por tin akshon, tereno i edifisio balioso, pero ainda no tin sufisiente plaka disponibel. Durante e traspaso por surgi ku mester paga impuesto i otro obligashon. Propiedat balioso no semper ta duna plaka mesora. P’esei, e famia mester sa di antemano kuantu plaka por ta nesesario i di unda e plaka ei lo bini pa kumpli ku obligashonnan. Mester wak no solamente e dia di traspaso, sino tambe e periodo despues.

Propiedat inmóbil por ta na nòmber di e empresario mes òf di e empresa. Si un edifisio òf tereno ta forma parti di e empresa, e propiedat tambe ta kore riesgo si e empresa haña problema.

Den algun kaso por ta útil pa pone e propiedat inmóbil den un struktura separá. Pero un kambio asina tambe por tin konsekuensia fiskal. Si e edifisio òf tereno a subi di balor, por tin impuesto pa paga ora di hasi e traspaso.

Separá propiedat for di kontròl

Durante preparashon por konsiderá diferente struktura hurídiko, manera un SPF, trust òf STAK. Ku un struktura asina, por separá propiedat, interes finansiero i kontròl di otro, asina Lopez Ramirez a duna di konosé. Esaki por ta útil si no ta tur yu ke traha den e empresa. Algun yu por mantené un interes finansiero sin haña mesun nivel di kontròl riba e empresa.

Pero e strukturanan aki tin diferente meta i konsekuensia fiskal. P’esei no tin un solo solushon ku ta sirbi pa tur famia.

Kuminsá na tempu. Un bon planifikashon di suseshon ta kuminsá ku un bista kla di loke e famia tin i loke ke logra. E famia mester papia tokante e papel di kada heredero, kon lo tuma desishonnan i kua impuesto por surgi.

E kòmbersashonnan aki no semper ta fásil. Pero posponé nan por kousa diskushon, preshon finansiero i inseguridat despues. Durante traspaso di un empresa familiar kosnan inesperá por presentá. Mas mihó e famia ta prepará, mas mihó por trata ku e konsekuensianan.