Betrian ta boga pa un outoridat apart
Kòrsou mester lanta for di soño. Djárason atrobe a tuma lugá un asesinato sumamente reprochabel. “E kriminalidat resien, e violensia, e desórden na skolnan, e kantidat di arma den nos komunidat, e situashon kaótiko den tráfiko diario i e fayonan serka Ministerio Públiko relashoná ku e falta di rapides di persekushonnan penal i e manera kuestionabel di apliká e prinsipio di oportunidat di Ministerio Públiko, i tur e preokupashonnan kresiente ku ta resultá for di esaki serka siudadanonan, no ta insidentenan separá.
Segun eks gezaghebber i promé minister, Stanley Betrian tur esakinan ta demostrá ku mantenshon di órden públiko i rèspèt pa regla i outoridat ta kada bia mas bou di preshon. “Ademas, nos kuerpo polisial ta konfrontá ku rekursonan limitá, embehesimentu di su personal i e riesgo di pèrdè polisnan ku hopi eksperensia.”
Segun Betrian no por warda te ora e situashon akí alkansá nos kompletamente. Pero, solamente mas polis no ta sufisiente. E asuntu ta trata tambe di outoridat i organisashon di esaki, responsabilidat i, prinsipalmente, integridat, e ta bisa mas aleu.
“Integridat mester ta un balor ku ta karga henter nos komunidat: gobièrnu i Parlamento, polis i hustisia, ámtenarnan i empresanan públiko, enseñansa i sektor empresarial, organisashonnan sosial, mayornan i hóbennan, i tambe prensa. Un komunidat no por spera un mantenementu efektivo di lei i regla si ta apliká reglanan na un manera arbitrario, si relashonnan personal ta pisa mas tantu ku normanan, i si ta tolerá konflikto di interes.”
Segun Betrian integridat no ta un luho, sino e fundamentu di outoridat. P’esei Kòrsou no mester papia solamente di kombatimentu di kriminalidat, sino tambe di restablesimentu di norma. Loke no ta permití, no ta permití, sin importá nòmber, funshon òf konekshon di ningun hende.
Responsabilidat
Mester determiná kla, Betrian ta enfatisá, ken ta karga diariamente i visiblemente e responsabilidat pa órden públiko. “Minister di Hustisia ta karga e responsabilidat polítiko pa su kartera. Pero vigilansia permanente i koordinashon di órden públiko ta eksigí un funshon di outoridat rekonosibel, a-polítiko, ku un mandato kla.”
Polis so no por mantené órden públiko, segun e eks gezaghebber. “E ta surgi ora komunidat huntu ta pone límite i, na mes momento, ta respetá e límitenan ei. Esaki ta eksigí responsabilidat di gobernantenan, institushonnan, profeshonalnan, mayornan, hóbennan i siudadanonan, i tambe un informashon públiko korekto i responsabel via prensa.”
Den esaki Betrian ta mustra ku no por ekskluí ningun grupo. Ni gobernantenan, ni empresarionan, ni polisnan, ni ámtenarnan, ni siudadanonan, ni mayornan ni hóbennan. “Reglanan mester konta pa tur hende i mester apliká nan konsekuentemente.”
Solushonnan
Ta kla pa hopi hende den komunidat, segun Betrian, ku Kòrsou mester pasa rápidamente pa e proseso di nominashon pa nombramentu di un outoridat pa órden públiko i seguridat separá, ku kompetensianan kla, independensia kaminda esaki ta nesesario, i un kòntròl demokrátiko i di estado di derecho fuerte. Ademas, invershon ta nesesario den fortalesimentu i rehubenesementu di kuerpo polisial, entrenamentu, material, finansiamentu struktural i un presensia visibel den bario i rònt di skolnan. “Pero e tarea di mas importante ta esun di karakter sosial.”
Betrian: “Kòrsou mester skohe atrobe pa integridat, di ariba pa abou i di abou pa ariba. Kòrsou no tin mester solamente di mas polis, sino tambe di outoridat kla, responsabilidat kla i restablesimentu di integridat i konsenshi di norma. Tur e akontesimentunan i aspektonan menshoná ta señalnan di un krísis latente ku ta desaroyando. Laga nos aktua awor, promé ku insidentenan individual krese bira un krísis sosial serio ku konsekuensianan devastador.”
