Kenley i Dodgers a forsa wega nr. 7 di Seri Mundial

LOS ANGELES.- Kenley Jansen ayera a saka 6 out di forma konsekutivo tirando inningnan ocho i nuebe pa salba wega i kontribuí pa Los Angeles Dodgers fòrsa wega nr. 7 di World Series. E ekipo di e picher yu di Kòrsou a logra un viktoria di 3-1 den un wega hopi difísil kaminda e picher Verlander (Astros) tabatin Dodgers kontrolá pa basta ratu.

Chris Taylor, Corey Seager, Kenley Jansen i Dodgers a logra pa trese mas emoshon den Seri Mundial, awor ku awe nochi tin ku hunga e wega desisivo.

Astros a bai ariba 1-0 den di tres inning riba homerun di Springer. Mientrastantu, Verlander tabata tira ponchenan tras di otro pa totalisá 9 ponche den seis inning di labor i permitiendo apénas 3 hit.

Pero den di seis, Taylor ta bati doblete pa empuhá kareda di empate kontra di Verlander, ku dos out. Seager ta sigui ku fly di sakrifisio pa hasi wega 2-1.

Den di shete Joc Pederson ta sòru pa e kareda final ora ku e bati homerun kontra di Joe Musgrove. Esaki ta su di dos homerun kontra di Musgrove den tres wega i a amplia na 25 e kantidat di homerun batí den e Seri Mundial aki, pa un rèkòrt nobo.

Pa awe Yu Darvis lo habri pa Dodgers. E manager di Astros, A.J. Hinch, a disidí pa no anunsiá un posibel habridó sino te despues ku resultado dje di seis wega bira konosí. Lo e por duna e bala na sea Charlie Morton òf Lance McCullers Jr.

SHARE

LEAVE A REPLY