Earlrich Lourens; Direktor KEP
KEP e aña aki a kue un rumbo inovadó. E tin un direktor nobo ku ta nos bon amigu Earlrich Lourens. E ta direktor di KEP ku ántes nos tabata konosé komo Kooperativa di Empleadonan Petrolero. Earlrich a studia den e área finansiero i manera el a bisa nos Prensa ta su hòbi i esei el a hasi tambe pa algun aña komo su trabou. Despues el a sigui studia i a disidí di bòltu i bai hasi loke el a studia.
Tur por bira miembro
KEP ta un kooperativa i un kooperativa ta konsistí di su sosionan pasobra nan ta kumpra akshon. I pa kumpra akshon bo ta bira ko-doño den e kaso aki KEP. KEP tabata para pa Kooperativa Empleadonan Petrolero. For di 2015 nan a kambia statuto i tur hende ku tin trabou por bira miembro di dje i asina el a bira solamente KEP. I tur hende ku tin trabou por bira miembro di e kooperativa. Earlrich a kaba di kumpli dos aña komo direktor di KEP i nan ta hasiendo nan trabou i ta biniendo hopi dilanti i hopi agresivo spesialmente den merkadeo. Nan ta hañando mas miembro i ta kresiendo bon. E ta kontentu ku e direktiva, i supervishon pero tambe ku e trahadónan pasobra sin nan e no por a hasié ni lo a logra.
Kresiendo den sosio
KEP awor aki tin kasi 3 mil sosio. I pa bira sosio bo mester tin un trabou. Na momentu ku ke bira sosio di KEP, tur kos ta bai digital. Riba nan wèpsait ta yena e formulario i mester di karta di trabou, prueba di adrès i un kopia di ID. I ta ‘upload’ via di e sistema mes i paga 75 florin. Di e suma ei 50 florin ta e promé akshon. I siguiente luna por spar mínimo 25 florin. I e sobrá 25 florin di e 75 ta pa inskripshon. Ta pone e-mail, number di telefòn i KEP lo manda tur informashon. Nan ta ‘online’ kaminda por wak ‘online’ tur kos i via e sistema ei mes por apliká pa fiansa. Tur kos ta sosodé digital ku ta mas efisiente. Fiansa serka KEP ta dura 5 dia i ta kla.
Proseso di fiansa
Pa por hasi un fiansa na KEP e persona mester tin 3 luna komo sosio i loke el a akumulá, e por fia te 8 bia e suma ei na akshon. Si ta mil florin den 3 luna e persona por fia di 5 te 8 bia. E ta menshoná 5 òf 8 bia pasobra segun Earlrich nan ta kambiando reglanan. I te na un máksimo di 75 mil florin. 2 aña pasá e tabata 50 mil florin i teniendo na kuenta e desaroyonan nan a hasié 75 mil florin. Esei a duna bon forsa na e portafolio di fiansa di KEP. El a subi rápido di 2022 pa 2023 ku kasi 50 porshento i a pone nan entradanan kasi 60% a subi. Nan ta hasiendo nan máksimo esfuerso i fiansanan ta yuda. Esei ta e punto fuerte di KEP, esta servisio i rapides ku nan ta hasi e kosnan.
Dividendo
Relashoná ku e parti di interes ku ta duna riba sèn di spar, Earlrich a splika Djasabra ku riba akshon no tin interes pero riba e depósito ta duna 1,25%. Tin un sistema di ‘time deposit’ ku ta 1,5%. E time ‘deposit’ ta mil florin mínimo i e máksimo ta loke nan presupuesto por duna. No ta mará na e máksimo pero por yega un kantidat respetá.
Invertí den sosio
Dividendo ta otro punto ku nos a papia ku Earlrich di dje. Tabata interesante pa sa si KEP ta paga dividendo. El a bisa for di tempu di covid no ta paga dividendo i esei ta segun Banko Sentral. Normalmente nan ta pag’é. Aña pasá nan tabatin un ganashi chikí pero no ta paga dividendo pero ta invirtié bèk. Tin diferente invershon ku ta keda hasí pa miembronan manera training, kurso ku nan por sigui, charla riba por ehèmpel Kinderbescherming. I tur esei ta kompletamente grátis ku ta duna e sosionan. Tur loke nan ta invertí pa e sosionan ta pa engrandesé nan komo hende. Mester kòrda segun Earlrich ku meta di un kooperativa no ta pa hasi ganashi pero pa yuda e sosio. Si nan tin surplus chikí nan ta re invertí bèk den miembronan i p’esei serka nan nan gastunan ta abou.
Atraé hóbennan
KEP entre otro ta purba atraé mas hóben pasobra esei si nan ta sinti falta di dje. Tin hopi ta spar pero kisas nan no a haña chèns pa sa kon pa e sèn rende i esei tin di motivá e hóbennan di dje. Resientemente Earlrich tabata na un konferensia afó i kaminda e por a mira ku mayoria di e miembronan di direktiva tabata hendenan hóben.
Kiko KEP ta hasiendo pa atraé hóbennan den e organisashon. Esei ta otro punto ku nan ta trahando ariba. E direktor di KEP a splika Djasabra ku huntu ku Fekoskan ku ta e organisashon madre di kooperativanan na Kòrsou a lanta un “jongeren raad” ku lo bin ku métodonan pa atraé hóbennan. Nan a logra basta hóben den KEP. Entre 18 i 40 aña e organisashon mundial di kooperativa ta definí komo hóben adulto. Ora wak KEP su sifranan nan a logra basta hóben. Ora wak sifranan por ripará ku nan tei i Lourens ta kontentu ku a logra esei. Nan tin kaba un hóben ku a bira miembro di nan direktiva. I tin mas hóben den KEP i mester di sanger nobo pa kontinuidat. Esnan ku ta mas adulto mester siña duna i mester kombiná eksperensia pa krese i tin kontinuidat den kooperativanan na Kòrsou. Mundialmente e ta asina i e mester ta aki tambe segun Earlrich. Na Kòrsou aktualmente tin 6 koperativa i nan ta dunando chèns na hóbennan, manera Lourens a bisa. “E interes tei i ta nos mes mester sigui pusha pa nos haña e kantidat di hóbennan respetá ku por hasi e trabou. No solamente pa bira miembro pero pa duna un man. Komo direktiva ta kasi boluntario”, segun Earlrich.
‘Compliance’ ta pisa pero nesesario
Banko Sentral teniendo na kuenta e desaroyonan mundial a bin ku reglanan basta estrikto pa kooperativanan. E direktor di KEPL a bisa nos ku Banko Sentral ta bin ku su reglanan i siendo un instituto ku tin lisensia di Banko Sentral sea bo ke òf bo no ke bo tin di kumpli ku leinan vigente E reglanan tei i mester kumpli. Tin Compliance pa kombatí labamentu di plaka i ta reglanan internashonal. Nos tin di kumpli i e ta pisa pasobra kooperativa no a kustumbrá. E reglanan semper tabatei pero no ku e kontrol sufisiente. E preshon ta grandi pero biniendo di e área di Compliance e sa kiko ta ferwaktu di nan. Tin hopi kos ku na ta mira bu komo instituto finansiero i bo tin di kumpli kuné. Bo mester tin e kosnan na lugá pa por sigui drei. Pa por bira mas profeshonal i ku vishon i sigur riba un término kòrtiku i sigui traha riba dje. Tempu ta kambia i asina tantu kos ta kambia i no solamente nos klima ta kambiando pero tin e Covid tambe ku a dal. Ta desaroyonan eksterno ku a pisa riba e isla chiki aki. I ku esakinan KEP a kaba di tuma un Credit Union den KEP ku ta Kobata ku ta esun di trahadónan di banko seguro i trust. (Kooperativa KEP i Kooperativa Bankario, Trust i Aseguro (KOBATA) resientemente a firma e akuerdo pa tuma over KOBATA, pendiente aprobashon final di Banko Sentral di Kòrsou i Sint Maarten (CBCS) den próksimo simannan. Ademas KEP a tuma over e portafolio di fiansa for di KOBATA). Esei ta mustra e konfiansa ku tin den KEP. Si kos no tabata kana bon nan lo no a haña e chèns aki pa krese. Bank Sentral ta traha bon ku KEP i nan tin bon kooperashon ku otro. Si Banko Sentral bin pa bo ta pasobra ta abo mes nan ke, segun Earlrich. Banko Sentral ta duna asina tantu chèns pa kumpli ku tur regla i si bo o kumpli ta bo mes falta. “Ami ta kumpli, Kep ta kumpli i nos ta sòru pa esaki. E no ta fásil i ta rekerí hopi parti finansiero pa kumpli”, segun e direktor a enfatisá.
Ser kreativo
Leinan ta duna KEP espasio pa hala rosea tabata nos pregunta na e direktor di KEP. El a bisa ku si bo ta hala sufisiente rosea ta otro pero bo por dil kuné. Mester publiká un lei ku a pasa algun anja pasa den parlamento pa Kooperativa. Tin un lei pero e no a keda publiká. E lei ei sinembargo mester keda di ‘update’. Jamaica, Trinidad and Tobago ta biba kooperativa i mas grandi ku banko mes. I aki ta siña di e paisnan ei pa sigui mehora produkto i servisio,. E no ta fásil i bo mester ta hopi kreativo pa atraé miembro, mihó servisio, mihó produkto ets. E ta un reto pero no imposibel. E ta satisfecho kon nan ta bayendo na KEP. Nan ta krese responsabel na miembresia i na fiansa.
Sifra di no pagadó hopi abou
Relashoná ku e parti di paga fiansa bek, ta bon konosí ku institutonan finansiero ta pasando basta difísil den e parti aki. Earlrich a bisa ku serka nan den pasado kisas un hende no a bin paga pasobra el a pèrdè trabou. Pero el a krea un maneho agresivo. El a yega haña un sifra haltu di no pagadó i awor e ta bou di e nivel ku ta 5% ku e mester ta.Nan ta na 3 % i dia el a drenta e Ratio di no pagadó tabata 10. Earlrich a logra no solamente ‘schrijf af’ pero tambe kobra, Nan no ta hunga e wega sosial so pasobra bo a fia e sèn anto bo mester page. I si no page ta parti beslag i e ta kumpli den henter reino ulandes. E no ta fásil pa kobra hende pero e ta bayendo bon.
Tur kos outomatisá
Pa loke ta mas lokalidat pa KEP Earlrich a bisa k tur kos ta outomatisá awendia i e nesesidat pa habri un filial awor aki e no ta mir’e. E hendenan por hasi tur kos riba telefòn. E komunikashon a bai asina fásil i tin kontakto konstante hende no tin tempu mas di para den rei mas. Hende no tin pasenshi i e ta sòru minimalisá e tempu ku e hende tin di dura serka nan. E ke pa e miembro ta kontentu. Tin kos ku mester regla personal pero tin hopi kos por keda hasi online.
