WILLEMSTAD.-  KFC Kòrsou no ta un deskonosí pa teknologia; digitalisashon ta mas serka di loke nos ta pensa. Na 2020 a implementá ‘pedido online’ via di nan wèpsait, WhatsApp i facebook messenger, huntu ku esaki tambe entrega te na kas. KFC t’un pionero di inovashon den industria fastfood na Kòrsou. Ayera djamars, nan a bolbe inová ku e promé ‘Smart Kiosk’ na Kòrsou! Ku un grupo chikitu di invitado i miembronan di prensa, KFC a hasi introdukshon kombiná ku un demostrashon di su promé ‘Smart Kiosk’. E kiosko inteligente ta hasi posibel ku e kliente por pidi i paga estilo ‘selfservice’.

E sistema ‘smart’ aki ta ampliamente konosí na otro partinan di mundu, sinembargo esaki ta e promé pa henter Karibe Hulandes! Di akuerdo ku Carlos van Grieken di Kenfood Trading N.V, “Esaki ta un novum pa Kòrsou i islanan den Karibe, nos ta sumamente kontentu di por ofresé e eksperensia aki na klientenan di KFC. Nan por hasi nan pedido fásil i lihé.” E promé kiosko inteligente ta stashoná parti paden na KFC Sta. Rosa.  E kliente por pidi i paga via di e kiosko usando un tarheta di krédito òf su tarheta bankomátiko di MCB.  Riba un pantaya spesial e por mira ora su pedido ta kla. Ora t’asina leu e por pasa na un espasio spesial na e ‘counter’ i tuma su pedido.

Ta importante menshoná ku e ‘smart kiosk’ ta den funshon kaba. Ounke e ta hopi fásil pa traha kuné, lo tin asistensia di KFC durante di e promé dianan. Tambe, maneho di KFC ta hasi un apelashon na tur kliente pa no usa ophetonan skèrpi riba e mashin òf pantaya. KFC lo pèrkurá pa e mashin i pantaya ta kontinuamente limpi, pero ta enkurashá klientenan pa usa hand sanitizer pa limpia man, komo un èkstra prekoushon.

LAGA UN KOMENTARIO

Please enter your comment!
Please enter your name here