WILLEMSTAD.- Dos siman a pasa ku Parlamento a bai di akuerdo ku e Lei di Bienestar di Animal unda a kuminsá pa inkluí kachó i pushi ku posibilidat pa añadí mas animal. E lei aki mester duna outoridatnan sufisiente hèrmènt pa atendé ku maltrato di kachó i pushi ku ta tuma lugá den nos pais. Resientemente por a mira kon un suheto sin eskrúpulo ta benta un kachó bibu for di baranka na shut den laman brutu, despues di a mara su pianan. Un akto asina baho i hopi kruel ku a okashoná un ola di repudio den nos komunidat. Pa basta tempu kaba parlamentario Giselle Mc William a hasi diferente petishon na Minister di Hustisia sr. Gririgorie, pa kuminsá asigná polis pa duna Dierenbescherming un man pa atendé ku e ola di maltratonan ku ta tuma lugá, pero esaki lamentablemente no a keda realisá te ku awor aki.
Awor ku e lei a pasa siman pasá, Dierenbescherming a firma un akuerdo ku CTB pa haña fondonan pa atendé ku bienestar di animal i tambe un tereno di Domeinbeheer pa un sanktuario pa kachó. Ta e momento pa por logra hasi e parti e di “ handhaving “ unu konkreto i dirigí dor di tin polis ku direktamente ta yuda den kombatí maltrato di animal.
Basá riba esaki Parlamentario mr. Giselle Mc William a manda un karta na Minister di Hustisia den kual e kièr sa ki dia Dierenbescherming ta haña polis asigná pa implementá e lei di Bienestar di Animal.
