Otro siman djadumingu dia 22 di mei lo tin e evento The Distinguished Gentleman’s Ride Curaçao. Un evento ku a kuminsá na  Australia for di e moveshon di Movember i awor Kòrsou komo promé pais den Karibe ta forma parti di dje. Ta trata di un evento pa konsientisá nos hendenan pa kita for di e tabú, habri i papia di temanan pa asina bai kontrolá regularmente òf bai dòkter manera tin síntoma. Mas tempran detektá, mas chèns tin di rekuperá di kanser di prostat i testíkulonan, ku ta esnan ku e organisashon ta konsentrá riba dje.

 

Rekoudá pa sigui investigá

Frits Terborg i Curd Evertsz huntu ku nos kolega Rilley Ignacio ta anfitrionnan i ku for di prinsipio ta parti di e komishon organisatorio. Tambe ta konta ku Wilfred Sneper i Albert Comenencia tambe anfitrionnan di e kampaña di konsientisashon. Ku plaser nos tabatin den nos programa Curd Evertsz i Frits Terborg i despues Rilley Ignacio a djòin e tim. Esaki ta promé bia di e evento aki na Kòrsou. Distinguished Gentleman’s Ride i ta trata di un paseo riba motersaikel ku ta un konsepto di Australia. E konsepto aki segun Cur ta unu usá pa trese atenshon i krea konsientisashon riba e tópiko di salú di hende hòmber. E ta mas pa kanser na prostat i kanser na testíkulo i salú mental. E konsepto ta na Australia registrá i Frits i Curd a inskribí na Australia pa haña e derechinan pa organis’é na Kòrsou. E ta tuma lugá 22 di mei ku  su meta prinsipal ta atenshon pa e tópiko di salú di hende hòmber i alabes rekoudá fondo pa bai pa Movember. Movember ta un fundashon mundial ku ta rekoudá fondo i ku e miónes ku nan ta haña ta invertí den siensia. Esei ta e konsepto; kore motersaikel komo un manera pa yama atenshon pero mas atenshon riba hende hòmber i tambe hende muhé.

Curd Evertsz

 

Hende hòmber no ta papia fásil di prostat i testíkulo

Hende hòmber ta papia di tur tema pero no papia di nan prostat i testíkulonan. Frits Terborg di su parti a splika ku na 2020 e mes a diagnostiká ku kanser di prostat. E tabata na tempu i a pasa den tur e proseso di operá i rekuperá. Durante di e periodo ei el  tende di dòkter Isa i dr Wijers di kuantu hende hòmber ta yega serka nan pero lat. Parse ku e hende hòmber ta haña problema ku prostat pero pa e hende hòmber no ta un problema ainda pa nan por bai dòkter. Ora nan yega dòkter nan ta asina lat ku e kanser ya a plama den nan kurpa kaba. I ora e plama den kurpa e ta sòru pa otro tipo di kanser i ta di e kanser ei bo ta muri. Bo no ta muri di kanser di prostat pero ta ora e plama e ta kousa e daño. Hende hòmber mester  tuma medida pa ora yega un sierto edat nan bai dòkter pa kontrolá di forma regular. Ta papia di kanser di testíkulo tambe pasobra e tambe ta peligroso. E por kuminsá for di ora e hòmber tin 15 aña i sigui krese. Djis imaginá mucha hòmber di e edat ei por haña algu na nan testíkulo i no sa kiko e ta i ku tur e efekto negativo ku e por tin riba nan salú mental. Djis imaginá e hende tin un problema i tin miedu di bai dòkter. E miedu aki ta trese depreshon pa e hende ku na su turno e hende por asta kometé suisidio. Mundialmente entre 300 mil i 400 mil hende hòmber ta mata nan kurpa pasobra nan no sa kiko di hasi. Prostat i testíkulo ta e loke e hòmber ta identifiká su hombresa kuné.

 

Detektá na tempu

P’esei ta bisa ku hopi hende ta wòrdu diagnostiká ku kanser na prostat den un situashon di koinsidensia. Pa kasualidat nan a bai dòkter pa un otro kos i dòkter a disidí di amplia e diagnóstiko i nan ta kai den kanser di prostat òf asta ta resultá ora e hende fayesé ku e tabatin kanser di prostat. No tur hende ta muri di kanser di prostat pasobra hopi hende ta muri kuné, sin ku el a mata nan. Pero tin e kanser severo i serio ku si ta kana na morto pero ku si detektá nan tempran, bo tin chèns mas grandi di bon diagnóstiko, bon tratamentu, bo ta sobrebibí. I ta p’esei e evento aki ke hala e hende hòmber den kombersashonnan pa bai dòkter di kas pa asina por detektá e malesa mas tempran posibel. I pa esaki mester di konsientisashon, papia, kombersá riba e temanan aki. Hende hòmber i hende muhé mester papia di e tópiko aki. Den e kaso aktual ta trata di e tópiko di hende hòmber pero e ta toka e hende muhé tambe.

 

No bèrgwensa

Frits a bisa ku e no tin bèrgwensa pasobra e no a pidi pa e malesa pero el a sobrebibí. E no ta kere ku mester skonde pa e malesa pero mester yuda hende hòmber pa pasa e drèmpel, pa bai dòkter i pasa over di dje.

Frits Terborg

 

Kon a detekt’é tempran

Un pregunta ku hopi ta hasi ta si e hende ku kuminsá ku kanser na prostat òf testíkulo si e por ripará esaki di un manera òf otro promé bai dòkter.  Tantu Frits komo Curd a splika ku esei por. Pero den kaso di Frits esaki no tabata e kaso. Pero serka dje e ta kontrolá tur aña, teniendo na kuenta su edat riba 60 hende i e sa ku e por haña problema. Den e sanger a mira e PSA di dje a subi, pero Frits no tabatin problema ni a sinti nada ku su prostat. I teniendo mas kuenta ku no tur bia bo por detekt’é bo mes sin bai dòkter, hopi hende por muri ku e kanser aki. Tin bia ta den outopsia ta haña sa. Pero tin hende ku si tabatin e, nan a keda tratá i a kura. Pero tambe tin otro ku tin e mas severo i ku tin bia no por skapa mas. I pa esun ku ta sinti algu, no duda i pensa ku e lo no yega na bo porta. Tin hende hòmber ta hasi komo si fuera e no tin e i ta ignor’é i no ta bai dòkter. I p’esei e organisashon a aserká e asosashon di dòkternan di kas pa nan tambe ta envolví i komo tal nan tambe lo tei na un di e paradanan kaminda nan lo papia di e yudansa ku ta den nan man.

 

E kontròl rektal ta esun di mas mihó

Loke hopi hende hòmber tin miedu di dje ta e forma ku ta kontrolá e prostat. Ta hinka dede kaminda nan lo no ke pa esaki sosodé. Nan ta kere ku hasiendo esaki nan ta pèrdè nan maskulinidat. Curd a bisa ku esei no ta e kaso. E investigashon na kurpa, ora dòkter bai mishi tur kaminda, dilanti i patras ta algu ku ta hopi hende bisa ku nan no ta bai hasi e kontròlnan aki. E no ta hasi nada, e dòkter ta mishi ku bo físikamente pero e no ta mishi ku bo ser i honor. Ta e hòmber mester tin e grandesa di laga e wòrdu saminá. Awor ku tèst den sanger ta wak ku por tin algu. Tambe por skèn ounke e investigashon di e dede den atras ta esun di mas mihó. I pa esun ku den nan sanger mira ku por tin algu, dòkter por disidí di hasi un investigashon pa sa e situashon di e prostat.

Un paseo elegante

E organisadónan ke haña mas tantu públiko posibel. Dia 22 ta kuminsá 3 or di atardi na Fundashon Prevenshon na Molenplein i ta terminá 7 or di anochi na Wilhelminafonds den Skalo. Durante di e 4 ora tin un paseo ku 5 stòp na kaminda i na kada un tin profeshonalnan den kuido ku lo papia di e tópiko. E paseo riba e motersaikel ta pidi pa tur partisipante bin elegante, dèfteg bisti. Bin ku bachi,  dashi pushi, giel etc., etc. E kareda no ta mará na klup konsekuentemente no ta permití niun partisipante ku nan vèst òf djèket di tim. Tampoko por pega algu na e kamisa ku ta identifiká na un ke otro klup. Rilley a splika den e entrevista ku ta masha great pa wak un kantidat di hende nèchi bistí riba nan motersaikel i e idea ta pa yega na e stòpnan.

Ta sali 3 or di Fundashon Prevenshon na Molenplein na Otrobanda, di einan ta kore e ruta i ta bai sentro di salu De Savaan (pega ku e botika), despues ta sali bai Sta Rosaweg serka Urologo dòkter Isa i Wijers pegá ku e botika tambe, di einan e ruta ta sigui pa pariba na e sentro médiko Sorsaka ku ta keda na e entrada kaminda gezaghebber tabata biba. Einan e dòkternan di e asosashon di dòkternan di kas lo papia. Di einan e ruta ta sigui pa TeleCuraçao. Einan lo tin sikólogonan ku lo elaborá. Di einan lo bai Sambil kaminda lo tin testimonio di hendenan ku a pasa den e proseso di kanser na prostat. Einan lo ta un parada basta emoshonal, kaminda sentimentunan lo bin ariba di e historianan. I finalmente ta terminá na Prinses Wilhelminafonds den Skarloweg. Ta hasi un yamada riba públiko pa no solamente para apoyá nan kantu di e ruta pero pa tei presente na e diferente stòpnan pa por tende kiko e profeshonalnan tin di konta. E organisashon na Kòrsou tin pèrmit di polis pa henter e evento pero tambe nan tin pèrmit di e organisashon mundial. Tur loke hasi na Kòrsou tin di kana segun e reglanan di e organisashon mundial. I no por desviá for di e organisashon internashonal. E ta un frankisia pero solamente e ta algu karitativo. Solamente Kòrsou a hinka e diferente stòpnan den dje, ku ta algu ku a sali for di nos isla i ku e otro paisnan awor a gosa i nan tambe lo ke us’é. Riba e mesun dia, 22 di mei simultáneamente tin e paseo aki den mas di 100 pais na mundu.

Ya a yega 60 koredó

Te ku momentu ku e entrevista aki a tuma lugá, ya e organisadó aki na Kòrsou a yega 60 koredó di motersaikel ku ta partisipá na e evento. Entre nan tambe tin algun dama. Tin asta un turista ku ta bin partisipá na e paseo aki. No ta un produkto turístiko pero e ta algu ku nan a haña derechi pa organis’é for di Australia i awor Kòrsou tambe por broma ku e evento. I ta bin aserka ku Kòrsou ta e promé pais den Karibe ku tin e evento aki. I p’esei un yamada na públiko pa bai tur e stòpnan pasobra loke ta bai papia i konta ta importante pa tende. Na kada un di e stòpnan ta algu diferente ta keda papia. Kada hende mester inskribí individualmente i no komo klup. Curd a pone énfasis ku no tin nada kontra niun klup pero esaki ta un di e reglanan internashonal. Meskos tambe tin énfasis riba e tipo di motersaikel ku ta permití. No por bin ku esnan ku ta kore duru pero mas bien e cruisernan. No por kore duru ni duna shou.

Jandino tambe tei

E evento tambe a trèk Jandino Asporaat. Durante di un reunion ku e organisadónan tabatin, Jandino a sorprendé nan. El a adaptá su plannan pa e tambe djòin e paseo i e evento aki. E no tei komo kómiko pa dibertí su públiko pero e tambe a komprondé e pensamentu i konsepto i ta duna su sosten ku su presensia. Bida tin su momentunan serio tambe i esaki ta un di nan i p’esei Jandino ke ta parti di e kos serio aki.

 

Invitashon pa públiko kompleto

E tres invitadonan Curd, Rilley i Frits ta hasi un yamada riba públiko pa bin engrande pa apoyá e koredónan riba nan motersaikel pero mas ku tur kos tei presente na e diferente stòpnan kaminda profeshonalnan lo papia, kaminda lo tin testimonionan i pa asina krea e konsientisashon pa pone atenshon riba kanser di prostat i testíkulo. Dia 22 di mei di 3 or di atardi te 7 or di anochi. Pa partisipá dos kos ta importante i esei ta registrá ku ta grátis. E Gentlemansride.com ta e lugá di registrá i por hasi un donashon na e organisashon Movember i e dia ei mester bin bisti estilo di realmente un kabayero distinguí.

LAGA UN KOMENTARIO

Please enter your comment!
Please enter your name here