PYONGYANG, NORT KOREA (AFP).- Rusia i Nort Korea a firma un akuerdo di defensa mutuo durante bishita di Vladimir Putin na Pyongyang, ku e mandatario ruso gradisiendo e dirigente komunista Kim Jong Un pa e apoyo na ofensiva militar ruso kontra di Ukrania. Durante dje bishita ofisial, e dirigente norkoreano a risibí Putin riba e pista di aeropuerto. E kayanan di Pyongyang a keda dekorá ku potrètnan dje mandatario ruso, kende awe ta sigui ku su gira bishitando Vietnam, sosio di Mòsku for di e époka soviétiko.

“E tratado di asosiashon global firmá awe, entre otro, ta referí na un asistensia mutuo den kaso di agreshon di un otro parti”, segun Putin a deklará despues di a firma e dokumento. Rusia no ta deskartá un koperashon militar-tékniko ku Nort Korea, segun e presidente a bisa mas aleu.

“Awe, huntu nos ta bringa kontra e práktikanan di hegemonia i neo kolonialismo di Merka i di su satélitenan”, segun Putin, sitá pa prensa ruso, durante un fiesta di gala na su honor.

Segun e dirigente norkoreano, e tratado “ta garantisá aliansa entre ámbos pais i lo kontribuí plenamente pa mantené pas e i stabilidat den e region”.

E potensianan oksidental, ku pa vários luna kaba ta akusá Nort Korea di ta suministrá munishon i misil na Rusia pa  guera den Ukrania, ta teme un refuerso di koperashon militar entre Mòsku i Pyongyang.

Putin a asentuá ku “Rusia i Nort Korea ta hiba un polítika eksterior independiente, i no ta aseptá e lenguahe di chantahe”.

Di su parti, Kim Jong Un a trese dilanti ku “Nort Korea ta ekspresá su pleno apoyo i solidaridat na e gobièrnu ruso” den su ofensiva den Ukrania.

E agensianan di prensa ruso a referí na Putin komo “e mihó amigu di Nort Korea”.

Mòsku i i Pyongyang ta aliadonan for di final dje Guera di Korea (1950-1953) i nan a estrechá nan relashon for di inisio dje invashon ruso di Ukrania den febrüari di 2022.

Putin, kontra kua tin un órden di aresto di Korte Penal Internashonal, a disminuí su biahenan pafó di Rusia, pero a realisá algun movida pa bishitá aliadonan klave, manera China.

LAGA UN KOMENTARIO

Please enter your comment!
Please enter your name here