WILLEMSTAD – Den área di Heintje Kool, den un kaya banda di Grenadaweg, a registrá un kaso di kimamentu di kabel, aparentemente ku e propósito pa saka e koper ku ta den esaki nan. E práktika di kima kabel pa logra saka e koper a bolbe lanta kabes. E biaha aki e kimamentu di un kantidat di kabel mei mei di un kaya di tera a kousa bastante molèster pa abitantenan den bisindario. Segun informashon ku EXTRA a risibí, e kabelnan a ser kimá pa asina eliminá e material ku ta kubri nan i logra yega na e koper ku tin paden. E koper despues por ser separá for di e restu di e kabel i keda bende.
Durante e kimamentu aki a produsí un kantidat konsiderabel di huma ku a plama den área i a kousa molèster pa abitantenan ku ta biba den e área di e sitio. E tipo di aktividat aki no ta algu nobo na Kòrsou. Den pasado a presentá vários kaso di hòrtamentu di kabel, kaminda e koper ku tin den esaki ta aparentemente e meta prinsipal. E último kaso aki ta mustra ku e práktika ta bolbe lantando kabes. E preokupashon, no solamente pa motibu di e huma sino e molèster ku esaki ta kousa pa abitantenan pero tambe pa e manera ilegal ku kabelnan ta wòrdu optené. Un aktividat ku tin konsekuensia tantu pa e ambiente komo pa personanan ku ta biba den e área.
Te na e momentu aki no ta konosí di unda e kabelnan a sali, ni ken ta tras di e kimamentu. Remarkabel i pa koinsidensia algun dia pasa tabatin un ladronisia di basta kabel serka un empresa den serkania aki. No ta konosí si polis a ser informá di e situashon òf si tin un investigashon andando. EXTRA ta sigui pendiente pa mas informashon tokante e kaso.
