Plantashon enorme di mata di koka den serunan di Teorama, na Norte de Santander, Colombia. E mata di koka ta importante pa remedi, pero mesklá ku kímiko ta bira kokaina.
VIENA, Austria (AFP).- Kansiyer di Colombia, Laura Sarabia, a hasi un petishon na Nashonnan Uní na Viena pa kita blachi di koka, usá pa traha kokaina, for di e lista di sustansianan prohibí. E minister a hasi un yamada pa ekskluí e mata “for dje lista di sustansianan mas dañino i esaki pa rasonnan sientífiko i práktiko”, den un deklarashon realisá durante un seshon di Konvenshon di Droganan.
“Siensia lo demostrá ku e blachi di koka riba su mes no ta perhudiká salú”, el a bisa.
E gobièrnu di presidente Gustavo Petro ta purba na kita e stèmpel negativo ku tin riba e mata, ku mesklá ku kímikonan den laboratorionan ta bira e droga konosí.
E promé mandatario iskierdista dje pais ta insistí ku kampesinonan i indigenanan ku ta sembr’é ta viktimanan di e narkotrafikantenan grandi.
Pa e komunidatnan indjan e blachi di kokaina ta sagrá i ta parti di kosmologia.
Sarabia a splika ku su petishon no ta enserá pa gobièrnu kolombiano “stòp di eradiká” e plantashonnan ilegal.
Ademas el a referí na e echo ku for di despues di yegada di Petro na poder, dia 7 di ougùstùs di 2022, te ku 31 di yanüari di 2025 outoridatnan a konfiská mas ku 1.9 mion kilo di kloridrato di kokaina i a destruí 454 laboratorio.
Apesar di dékadanan di guera kontra di mafia, Colombia ta sigui komo e mayor produktor mundial di kokaina, fuente di finansiamentu di kartelnan, gruponan paramilitar i gueria.
