WILLEMSTAD. – Djadumingu último Kiwanis Club Curaçao a hasi 20 famia na Kòrsou felis ku un bunita pakete di Pasku. Miembronan di Kiwanis mes personalmente a bai na 11 kas di famia pa hasi entrega di e paketenan aki i laga e famia en kuestion sinti ku tin un organisashon ku ta kòrda riba nan. Tabata momentu di hopi emoshon pa e famia, no pa motibu ku nan a haña un pakete reimu ku sigur nan lo por usa den e dianan di fiesta aki, pero pa e motibu di e atenshon spesial ku miembronan di e klup di servisio a paga pa personalmente bini hasi e entrega.
Kiwanis Club Curaçao ta konsiente ku tin hopi nesesidat den nos komunidat pero mester a limitá su mes na 20 famia ya ku finansieramente ta esei nan por a permití nan na e momento nan aki. Den e 20 famianan atenshon spesial a bai pa famia ku tin mucha chikitu. Mucha ta hunga un ròl masha importante den e organisashon i ta p’esei ta duna preferensia na kasnan ku tin mucha.
Miembro nan di Kiwanis un biaha mas a keda masha impreshoná ku e pobresa ku tin na Kòrsou i sirkunstansianan hopi penoso ku diferente di nos kon siudadanonan ta biba aden. Kiwanis Club Curaçao ta kontentu di por a trese maske ta un tiki alegria den e famia konserní den e tempu di Pasku aki pero ta realisá tambe ku e problema ta fundamental i ta spera di kurason ku e instansianan konserní lo tuma Pobresa na Kòrsou na serio i mira kon por yuda e parti di nos komunidat aki ku ta sklama pa yudansa.
Kiwanis Curaçao ta masha gradisí na tur hende ku a yuda pa hasi e mainta un éksito. Un danki spesial ta bai na sr. Ludwig Muiden ku a sòru pa e parti musikal ora tabata bai na e kasnan i miembronan di keyclub Fasbo ku tambe a yuda masha bon mes. Tambe un danki di kurason na Evelyn Ignatio di Wit Gele Kruis pa su konseho i guia den selekshon di e kasnan di famia. Wit Gele Kruis a sòru di hasi entrega di e 9 paketenan ku Kiwanis Curaçao no a logra di repartí.
Pa motibu di privasidat no ta pone ningun potrèt di e famia ku Kiwanis a bishitá pero lo limitá pa pone e miembronan di Kiwanis den akshon. Na nòmber di Kiwanis Club Curaçao nos ta deseá henter pueblo di Kòrsou Un Bon Pasku i un Próspero Aña 2017 i ta spera ku den e aña nobo Kiwanis Club Curaçao lo por sigui konta riba e apoyo di nos pueblo.
