WILLEMSTAD.- Klientenan di Girobank ayera a haña un komunikado ku ta urgi tur kliente pa lanta tur fondo disponibel inmediatamente. E yamada urgente a bai na tur kliente di Girobank ku un kuenta koriente i/òf di spar na Girobank pa lanta tur nan fondo disponibel inmediatamente. A korto plaso lo terminá tur servisio bankario. Entrante 1 di sèptèmber próksimo lo no ta posibel mas pa hasi uso di sistema di online banking. For di 15 di sèptèmber di 2021 lo desaktivá tur tarhetanan di débito di Girobank. Esaki ta nifiká ku for di 15 di sèptèmber di 2021 por lanta fondonan solamente na filial di Girobank na Janwe. E servisio aki tambe lo keda terminá gradualmente.
Den kuadro di e terminashon kontrolá di Girobank N.V., e siguiente servisionan bankario di Girobank lo keda adaptá entrante 1 di ougùstùs 2021:

Transferensia periódiko (standing order) i kobransa/retiro
outomátiko lo stòp.

No lo sigui fasilitá pago di penshun di AOV.

Transakshon pa tersero, manera pago di utilidat i OB, no ta posibel mas.

No por depositá sèn kèsh ni chèk (di otro banko).

No ta prosesá transakshon kèsh den moneda estranhero.

E filial na Skalo lo ta será.

Entrante 1 di sèptèmber 2021, lo no prosesá transakshon ku drenta via Girobank su sistema di online banking i riba dia 15 di sèptèmber 2021, lo desaktivá tur tarhetanan di débito di Girobank.

Luna pasá Girobank a supliká su klientenan pa mas pronto posibel sera nan kuenta(nan). For di 15 di yüli tur ATM di Girobank ta for di servisio.

Pa informashon por akudí na filial na Janwe di djaluna pa djabièrnè, di 8.00 am – 3.30 pm.

Pa mas informashon bishitá e wèpsait: www.girobank.cw

LAGA UN KOMENTARIO

Please enter your comment!
Please enter your name here