Knops no ke papia di pèrdida di outonomia

Knops ta urgí sektor empresarial pa invertí den CAS

DEN HAAG.- Ulanda tin empatia ku e situashon ku e islanan Kòrsou Aruba i Sint Maarten ta konfrontando debí na corona virus, den e kuadro aki a duna i lo sigui duna yudansa humanitario sin mara esei na kondishon. Na Ulanda por a tuma di vários akshon, entre otro esun di Jandino, ku a organisá un akshon pa generá fondo pa yuda e islanan aki i esei ta di aploudí. E ta mustra e relashon i kompromiso den reino. Na palabra sekretario di estado Raymond Knops kende a bisa tambe ku e ta respetá outonomia di e paisnan, pero na otro banda tin fiansa pa sumanan hopi grandi i pa esei Ulanda ta pone kondishon pa fortifiká e paisnan i prepará nan pa futuro. Knops a hasi apelashon na sektor empresarial pa sigui invertí den e paisnan.

Knops a kontesta pregunta di vários representante di medionan di komunikashon di Kòrsou indikando e.o ku e tin miedu ku e tres paisnan Kòrsou,Aruba i Sint Maarten ta dependé hopi di Ulanda anto e pregunta ta surgi kon outónomo nan ta di bèrdat. E no ke papia di pèrdida di outonomia, pero mester tuma medida pa drecha situashon di e paisnan.

Ulanda a kuminsá brinda yudansa, pero ta mira ku e situashon aki lo bai dura basta largu i p’esei ta wak te kon leu por hasi esfuerso pa e paisnan tuma bon desishon. Riba e komentario di minister Suzy Cameli-Romer ku Ulanda ke bai bek temporada di West Indische Compagnie e sekretario di estado a bisa ku e ta konsiderá esei un komparashon ku no ta na su lugá.

Knops ta kere ku e pueblonan ta den nesesidat i nan ke mira perspektiva i pa esei tin kosnan ku mester kambia. Esaki ta e momentu pa hasi kambionan nesesario. Tur e hendenan ku a pèrdè trabou ke sa kon nan por sigui biba i ki tempu nan por haña trabou atrobe. Mas aleu Knops a bisa ku su ambishon ta pa hendenan haña trabou i stòp ku pakete di kuminda.

Echo ta ku debí na e lei di konsenso di reino riba supervishon finansiero gobièrnu di Kòrsou no por bai fia plaka niun otro kaminda ku no ta Ulanda. Tin un pakete ku pregunta pa tuma e desishonnan korekto ku ta brinda perspektiva.

Pa loke ta trata e entidat ulandes ku Knops a proponé el a bisa ku e entidat mester tin hende pa maneh’é i oper’é. E ta kere ku mester tin hende di Karibe ulandes i Ulanda aden. Mas detaye den edishon di EXTRA.

(Foto Kortesia Noticiacla)

 

SHARE

LEAVE A REPLY