Naturalmente den haf di Rotterdam

ROTTERDAM.-outoridatnan ulandes a informa awe ku nan a konfiská e kargamentu di mas grandi di droga, esta kokaina, den historia di haf di Rotterdam. Ta trata di un kargamentu total di 4022 kilo di kokaina ku tin un balor riba kaya di mas ku 300 mion euro. A haña e droga den kònteiner prosedente for di Sürnam ku tabata kargá ku palu. E kònteiner tabata destiná un pais na Polonia.

Den último dianan outoridatnan ta masha aktivo ku nan akshonnan i a konfiská basta droga i a realisá vários detenshon. E siman aki polisnan a skapa 9 hòmber ku tabata será den un kònteiner. Parse ku e hòmbernan mes a yama pa pidi yudansa di polis despues ku nan tabata será den un kònteiner pendiente pa Sali riba tereno di haf pa kue droga ku a yega den otro kargamentunan, pero di un manera òf otro e porta di e kònteiner a lòk i e hòmbernan a spanta pensando ku oksígeno por kaba den e kònteiner i tur lo sofoká i muri. Resientemente a detené un hóben di apénas 14 aña ku tabata partisipá huntu ku e gruponan ku ta saka droga for di kònteinernan.

Aña pasá a konfiská alrededor di 40.000 kilo di kokaina den haf di Rotterdam i e aña promé a konfiská alrededor di 30.000 kilo.

 

LAGA UN KOMENTARIO

Please enter your comment!
Please enter your name here