CARACAS (AFP).- Un miembro dje ekipo polítiko di e lider opositor, Maria Corina Machado, kende durante mas ku un aña tabata refugiado den embahada argentino na Caracas, a regresá Venezuela for di su eksilio na Merka ayera. Por sierto, un regreso ku Machado mes no a logra ainda.
Omar Gonzalez, huntu ku sinku otro persona, a logra hui i a drenta e embahada di Argentina den mart di 2025, meimei di un situashon di vários aresto promé ku e elekshon presidensial di 28 di yüli. Den mei di 2025 e grupo a logra sali for di Venezuela i esei danki na un operashon sekreto norteamerikano.
“Sigur, m’a papia ku e lider di venezolanonan, Maria Corina. El a pidi mi pa habri kaminda p’é, pues despues di mi… e lo sigui pa bin kambia e kosnan aki”, segun Gonzalez a bisa na su yegada na e aeropuerto di estado Anzoategui, segun un video publiká ayera pa su partido Vente Venezuela.
Vários opositor polítiko a regresá e pais despues di e kaptura den yanüari di Nicolas Maduro di parti di forsanan norteamerikano. For di e momentu ei, Delcy Rodriguez ta goberná di forma interino bou di preshon fuerte di Washington.
“Mi kerido Omar, est’un emoshon pa bo regreso na bo Anzoategui stimá. Mi ta spera regreso pronto di tur venezolano na nan kas”, segun Machado a skirbi den un mensahe riba Instagram.
Den 2024, outoridat elektoral a deklará Maduro komo ganadó pa un di tres mandato meimei di denunsianan di froude. Esnan den asilo den embahada argentino nunka a risibí un deklarashon ku ta deklará nan liber di kualke akusashon. Maduro a kibra relashon ku Argentina miéntras ku Brasil a tuma e sede diplomátiko bou di su protekshon. E opositornan den sekreto, ku apoyo di Merka, a logra sali for di e pais i a bai Merka den loke e hefe di diplomasia merikano Marco Rubio a kalifiká komo “un operashon eksakto”.
