KOLUMNA

Un bon siman pa tur nos lektornan…

Un wikènt karga ku ambiente…

Organisadónan di Hak’e a bolbe duna pueblo un tremendo Jump In Festival manera nan mes ta yama e evento…

Ta na mas ku 1 okashon ku e organisadónan ta logra pa ‘sold out’ e evento ku a bira un evento prinsipal riba e kalènder di aktividatnan di Karnaval…

E konsepto ku a start kuné den Landhuis Brievengat a krese i bira e evento di bai den temporada di Karnaval…

Baidónan di aktividat di Karnaval ta marka Hak’e komo promé evento ku mester bai i asina tin un par di jump in mas…

Te ainda e temporada di Karnaval a konosé aktividatnan ku tur a bai bon, pues ku un resultado positivo…

E mesun komentarionan tabatin despues di Hak’e ku AMAK mester usa e konsepto di Hak’e pa haña inspirashon pa kon drecha Festival Center pa Festival di Tumba…

Pa e dekor parti pafó mi ta apoyá e pensamentu, parti paden e ta bira difísil segun mi pasó bo tin un kompetensia ta tumando lugá i ku transmishon di entre otro radio i televishon ku mester di espasio pa por duna kobertura na e aktividat…

Lo por pensa otro kaminda pa pone radio sinta i lo mester krea e posibilidat ku e públiko di general lo por yega mas serka na stage, pero esaki sigur lo trese resistensia…

Ayera ma tuma nota dje reakshon di Chris Strick riba facebook relashoná ku e manera ku bandanan ta hinka nan repertorio den otro i e kestion di toka piesa di bandanan ku ta tokando durante di mesun evento…

Rason mi ta dun’é, pasó bandanan no ta dediká tempu pa nan produsí ‘roadfire’ nobo, nan ta preferá di traha un potpouri di tur kos huntu den mesun wea…

Ayera anochi pa kolmo mi tabata mirando e ripitishon di e evento ‘Rei di Kaya’ i einan tabatin algun ehèmpel klásiko di piesanan ku a keda presentá den potpouri ku ta di otro banda ku ta tokando durante dje mesun evento…

Marcha Hubenil a resultá kolorido…

E biaha aki mi no tin reklamo riba gruponan ku no tabata dediká na produsí algu na nivel…

Loke si mi ta kere ku mester evaluá e gruponan promé ku presentashon den marcha…

Ta saka e marcha 4 or di atardi mester traha riba iluminashon pasó sa delantá ku e muchanan lo bai marcha un parti dje marcha den skuridat…

Esaki mester ta un punto di atenshon pa Fundashon JAG pa djaluna otro siman…

Muchanan ta futuro di nos Karnaval, mester kuminsá traha riba un plan di relevo, mester drenta skol ku e aktividat i yuda skolnan pa por logra haña spònser pa nan por partisipá na Marcha Hubenil i Parada di Tiner…

Pa loke ta trata muzik, ma gosa Rei di Tumba, ma gosa Zoukaino Jacobs ku ta entre esnan ku a sa komo hóben pa entretené nan grupo pero tambe e públiko kantu di kaya…

E siman aki ta siman di jump up, ku e klímaks di Karnaval kuminsando djabièrnè awor…

Fo’i awe nochi ta manera ta un pagara bo ta sende, tur dia 1 òf mas jump in i pa sera esaki ku Gran Marcha di Karnaval…

E siman aki tambe ta bira e siman di traha te mardugá pa e gruponan ku no ta kla ainda ku nan trahe i òf detayenan ku falta pa e grupo por sali i lusi den e diferente marchanan…

Polis a saka un promoshon pa bon komportashon i tambe gobièrnu ta usando medionan sosial pa duna informashon importante pa loke ta trata Karnaval, esaki sigur ta di aploudí…

Bai trankil den e siman aki, si bo ta dal beter hasi esaki na midi i un bon komportashon ta di apresiá…

Bon siman shonnan, mayan nos tei bèk ku mas…

SHARE

LEAVE A REPLY