Un felis djárason pa tur nos lektornan…
Siman a parti na dos i ta basta informashon nos tin pa kompartí ku nos lektornan awe…
Nos ta start awe ku e informashon ku despues di 32 aña lidernan di Crazy Diamond a tuma e desishon ku nan no ta sigui mas ku e grupo di Karnaval…
E informashon aki a keda konfirmá pa Monique, lider di CD…
Nos a risibí e mensahe ku a manda rònt pa miembronan…
Crazy Diamond no ta solamente un nòmber, e ta e resultado di 32 aña di pashon, dedikashon i amor pa karnaval…
Den e mensahe ta yama danki di kurason na tur hende ku a forma parti di e historia di CD, e miembro, e kolaboradónan, e amigunan i tur hende ku a aportá, chikí òf grandi pa hasi Crazy Diamond loke el a bira…
Tur rekuerdo i tur momentu kompartí lo keda para semper den nos memoria. Danki pa e lealtat, e sosten i e amor durante tur e añanan, asina e mensahe a terminá…
Nos ta kombensí ku un desishon asin’aki ta un duru pa tuma, pero bo mester keda realista ku e situashon ku a presentá…
Liga Blowi, e grupo di sosten di nos selekshon nashonal di futbòl ta pendiente pa organisá un jump in i pa esaki nan tin un rueda di prensa djaweps awor kaminda nan lo bai duna tur informashon relashoná ku e evento ku nan ta organisando …
E fundraising aki dimes lo kontribuí pa nan por kubri gastunan di biahe pa bai animá nos selekshon di futbòl durante di nan weganan den Mundial di Futbòl 2026 …
Nan meresé abo i ami su sosten pa nos por tin un grupo di simpatisante pa duna sosten na e selekshon…
Mi tin basta dia sin tende nada dje tim di prekario, ayera ma buska kontakto i a risibí e siguiente informashon…
Djaweps, pues mañan mainta 9or na ofisina di ROP na Plaza Horacio Hoyer lo tuma lugá e Rifa pa lista di espera 2026…
Manera ta konosí a duna oportunidat pa esnan ku ta interesá pa un espasio pa wak karnaval ku nan por a inskribí pa bai riba e lista di espera…
Mañan mainta lo tin e Rifa di Prekario 2026 i lo saka e ganadónan di ‘Bo Prekario 2026’…
EXTRA lo ta presente komo testigu i tambe kubri e sorteo, pues ku tur probabilidat lo bo por sigui e sorteo via di e plataforma digital di Korant EXTRA…
Preparashonnan pa Festival di Tumba Hubenil ta sigui, ensayonan ta tumando lugá i ayera nos a komprondé ku ta pendiente yegada di e sekshon di brass pa ensayonan kue un dimenshon kompletu…
Un biaha mas mester gradisí e kompositor i areglistanan ku ta duna nan aporte na e festival…
Festival di Tumba tambe ta den ful swing, djaweps awor atardi lo tin un rueda di prensa kaminda lo amplia riba TUMBA +, e transmishon di Festival di Tumba via streaming ku lo ta algu super e aña aki…
Ayera nochi e tim di presentadónan a reuní i mayan atardi nan lo keda presentá…
Ideanan greit a keda presentá i no ta sobra ami nada mas pa bisa bu ku buska bo TUMBA + pa bo por disfrutá di un tremendo Festival di Tumba 2026…
Ayera mi a tuma nota di un inisiativa di Ike Jesurun, nos baluarte 2026 pa Festival di Tumba a kuminsá kuné….
Ike riba su página di facebook a informá ku tur dia lo e buta un artista ku el a traha kuné den Tumba…
Su promé artista tabata Gregory Colina i ta hopi greit e loke ku el a hasi …
Hopi biaha nos ta lubidá hendenan ku ta duna sosten na kualke proyekto ku nos tabatin i na momentu ku bo ta den spòtlait, bo mester korda riba nan tambe…
Ma gosa kon Gregory a reakshoná riba e dedikatorio di Ike pa su persona…
Hopi greit Ike …
Awe nos ta kòrtiku, tabata un plaser i te mañan ku Dios ke!…
