Un bon siman na tur nos lektornan…
Nos tabatin henter un siman dediká na Festival di Tumba tras di lomba kaminda Kòrsou a biba un siman kargá ku músika i piesanan nobo pa e archivo di Festival di Tumba…
Un siman kaminda nos a mira hóbennan destaká den Festival di Tumba, prospektonan presentá den gran forma i e trabukonan tradishonal bende nan kueru karu…
Un siman kaminda e selebrashon kultural musikal mas grandi di Kòrsou a bolbe resaltá…
AMAK a traha for di aña pasá hopi duru pa e organisashon presentá un evento grandi bon kordiná kaminda e públiko por a disfrutá i eksperensiá un Festival Center adaptá pa duna bon servisio na e públiko…
Pabien n’e públiko tambe ku a bin pa disfrutá i te asina leu ku mi sa no tabatin niun insidente den Festival Center…
Kòrsou tin un Rei di Tumba nobo, Sontje Mercelina, un hóben humilde ku a presentá un tumba komponé pa Ike Jesurun den gran forma i a sa di kumpli ku su deseo pa saka kara di Bibi Gonet, dfm…
Pabien na ERA, na promé lugá pa duna hóbennan e oportunidat pa partisipá ku un banda di gran trayektoria manera boso ta…
Pa duna guia i karga ku tres hóben i laga nan sinti nan mes parti dje famia Outéntiko…
E final di Festival di Tumba tabata un ‘nail-biter’, mi ta spera ku mayan ora di entrega di premio ku presidente di hurado por bolbe duna un impreshon di kon serka di otro e puntuashon dje final tabata…
Un evaluashon di Festival di Tumba 2026 mester tuma lugá pa skucha kiko no a kana manera a plania pa prepará esaki bon pa otro aña…
Djasabra mainta, manera solo a sali ruta di karnaval a keda kolmá ku e hendenan ku sea a bin pone nan treiler òf a kuminsá traha riba nan stellage pa por wak Karnaval…
E aña aki mi tin e impreshon ku Prekario tabatin bon komunikashon ku esnan ku a pidi un parsela kantu di kaya…
Meskos, te ainda tin indikashon ku tur hende a kumpli ku e instrukshonnan di e tim di Prekario…
Mas den siman ora ku kontrolnan kontinuá nos lo por tin un reportahe riba esaki…
E jump up di djasabra a resultá un éksito rotundo…
Masha ten no tabatin un jump up, esaki sea ku no tabata duna pèrmit òf ku gruponan no tabata interesá i tabata traha mas fásil riba un jump in…
Beehives por mira bèk riba un evento eksitoso kaminda un gran kantidat di hende a jump, miéntras ku un grupo grandi a para kantu di kaya fo’i kuminsamentu riba Schottegatweg Zuid, te na final Schottegatweg Oost mas o ménos na altura di e krusada di Biesheuvel…
Hopi hende mes fo’i trempan, ku tur kos ku bo por a pensa, ma mira hende ku grill, otronan a bin ku trùk i treiler i pone esakinan fo’i trempan…
Dos grupo di Karnaval sigur ma mira ku tabatin nan treiler butá ku animashon di dj pa pone ambiente kantu di kaya…
Tumba ku roadfire i piesanan popular a zona kantu di kaya i e públiko a sinta warda i gosa na su antoho…
Nos tei drenta e siman di Marcha Hubenil, mi ta spera ku e siman aki si radionan kuminsá toka e tumbanan pa tur hende i sigur e muchanan kustumbrá ku entre otro e tumba ganadó…
Ayera tabatin e Marcha riba Kabai, a start 4or di atardi, pero segun mi e orario ei ta muchu lat…
Otro punto di atenshon ta e kantidat di partisipantenan ku ta riba kabai…
E ta un evento pa haña públiko kantu di kaya, pero e ta logra su meta pa atraé mas gruponan di kabai riba kaya?…
Mester evaluá esaki na serio i yega na konklushon riba e evento su totalidat, kantidat di partisipante i tambe evaluá orario di salida i òf kaminda ta kaba e marcha…
Ayera 8or di anochi e marcha tabata riba F.D. Rooseveltweg na altura di Sta. Maria Galleries, ainda tabata falta henter un pida…
Ta responsabel pa e marcha ta dje largu ei i kaba lat? …
E siman aki tin un kantidat di Jump In ku sigur ta hala atenshon di públiko, ta spera un bon komportashon di tur hende pa nos aktividatnan kana nechi sin niun insidente…
Pabien na e ganadó di nos kampaña di Rei ken ta sali Rei òf Reina di Tumba 2026…
Hopi hende a partisipá loke ta indiká kon popular e kampaña ta i ku e premio tambe ta un premio atraktivo…
Bon nos tei move, un bon siman, ban sigui disfrutá di nos temporada di Karnaval, pero kòrda semper ku nos tin un kompromiso ku trabou, pa huntu nos traha na adelanto di nos Pais…
Felis dia!…
