Un felis djamars pa tur nos lektornan…
Ata nos ku otro edishon di ‘DEN E BEMBE’…
Awe nochi AMAK tin su tradishonal entrega di premio relashoná ku Festival di Tumba 2026…
E evento lo keda transmití via di ‘streaming’ for di 7or di anochi riba diferente plataforma digital, entre otro e página di Facebook di extracuracao…
Sintonisá awe nochi…
Pa otro siman ta pendiente pa e sorteo di Tumba+, e kampaña tabata un éksito kompletu i awor mester saka e ganadónan ku lo gana outo, 5 mil florin kèsh i tambe e pakete pa 4 persona bai wak e selekshon di Kòrsou den e mundial di futbòl na Merka…
‘Great’ pa tuma nota ku Beehives a organisá Karnaval den bario i ku nan a bishitá SGR Groep – Sentro Ed Eleonora…
‘Great’ ku e organisashon ta duna atenshon na diferente dje institutonan pa nan tambe por selebrá Karnaval…
Den pasado bo tabatin diferente organisashon sosial ku tabata organisá i duna atenshon na klientenan di e institutonan …
M’a gosa e videonan ku Taskforce Karnaval Bándabou a traha pa konsientisá e paramentu kantu di kaya pa Marcha di Karnaval di Bándabou, kiko por i kiko no por…
Taskforce a bishitá e gruponan di Bándabou tambe pa mustra ku e proyekto pa logra mas grupo di Bándabou tambe ta kanando bon…
Nilda Pinto SBO a duna homenahe na Sontje Mercelina, hopi ‘great’…
Sontje a sali promé finalista di Prens i Pancho grandi i tambe Rei di Tumba…
Lesa e artíkulo riba e siguiente página…
E siman akí ta siman pa finalisá e trabounan pa nos gruponan hubenil por broma djadumingu awor durante di Marcha Hubenil…
Ta hopi trabou tin ainda i mester kaba na ora …
Tin grupo hubenil ku tin nan grupo grandi i e miembronan di grupo grandi ta duna un man pa esnan di hubenil por ta kla promé ku wikènt…
M’a lesa riba retnan sosial ku Claudius Phillips a pidi pa Lord Lally, e Rei di Soca 2026 di Aruba, biaha kuné e wikènt akí pa Kòrsou pa e por presentá durante di Hak’e…
Aki tambe tin basta hende ku ta den e ‘kick’ di e ‘Lizard’ ku a konkistá Aruba fo’i su presentashon preliminar…
Bon nos t’ei move, Karnaval ta un momentu pa nos kombibí ku otro sin niun problema, kualke opstákulo ku lo por tin esaki mester wòrdu superá…
Karnaval ta positivo, ta un selebrashon, no un momentu pa diskutí ni tampoko demostrá outoridat…
Felis dia!…
