Un felis djasabra, nos ta na bispu di Marcha Hubenil…
Konforme e lista di AGKK tin un total di 22 grupo hubenil partisipando den Marcha Hubenil ku ta tuma lugá mañan kuminsando pa 2or di mèrdia na Retonde Raffic Hariri…
Di informashon ku nos a logra di optené for di AGKK ta indiká ku tin mas o ménos 1044 mucha ku lo forma parti di Marcha Hubenil ku mas o ménos 122 lider i o ayudante den e diferente gruponan…
Mayoria grupo ta entre 25 pa 50 partisipante, miéntras ku tin tres grupo ku ta surpasá 100 partisipante …
Sprinchi ku 110; Konfeti Pronketi ku 120 i Estrenitos ku 130 mucha ta esnan mas grandi…
Tremendo e ambiente ku tabatin djaweps anochi na kas di Sandy Atimadora…
Sandy su grupo E he he a organisá nan tradishonal sera konosí party i a introdusí tambe nan banda di kas ku lo kompaña e grupo…
Di loke nos a komprondé e banda ta zona bon i ta karga ku ambiente…
Taskforce Karnaval Bándabou tambe ta trahando duru pa e selebrashon di Karnaval na Bándabou…
Nan ta pendiente pa otro siman tene un rueda di prensa kaminda nan lo bai duna tur detaye relashoná ku Karnaval di Bándabou…
Te ku ayera ainda tabatin gruponan ta diskutí tokante e sistema di puntuashon di Festival di Tumba…
Ami ta kere ku na un siguiente okashon Presidente di Hurado, Dr. Francis de Lanoy mester bin ku bòrchi i duna un splikashon amplio na tur esnan ku no ta komprendé e situashon…
Les di wiskunde pa por komprondé e fórmula kon ta vota den Festival di Tumba…
Turistanan a gosa e ambiente di Karnaval ku tabatin ayera tardi den Punda relashoná ku e entrega di yabi di Willemstad na e embahadornan di Karnaval 2026…
Hopi turista den kaya ku a saka telefòn i kámara pa por a kapta e animashon musikal di brasbènt i tambe e embahadornan …
Lord Lally, e Rei di Soca di Aruba tabata di bishita na Kòrsou ayera pa un presentashon ku Oreo den Hak’e…
Un kabayero humilde ku ta gosando un mundu ku su reinado…
Ma gosa kon Reinier ‘Reintje Rock’ Lijfrock a bai topa kuné durante di sound check di Oreo i nan a kompartí un ratu dje enkuentro riba retnan sosial…
Anochi bo no tin nada di hasi, bula drenta den outo ku famia i boso rekoré e ruta di Karnaval, un ambiente úniko ku e stelazjenan kantu di kaya…
Hungamentu di dominó, sinta dal drinks, otronan ta kaba di fèrf i dekorá nan stelazje pa e ta kla pa djadumingu…
Tumba ta zona i pueblo alegre disfrutando dje temporada di Karnaval…
Pa esnan ku ta den grupo di Karnaval, pasa sede duna un man na loke ku falta pa hasi, duna bo kontribushon pa yuda engrandesé bo grupo di Karnaval…
Kòrda pa djadumingu awor sòru pa e muchanan kome bon mainta, keda hidratá durante henter dia i pa ora di sea bai den grupo òf para kantu di kaya, sòru pa nan tin nan dòpi di orea bisti pa kuida nan oido kontra di molèster di zonido…
Pa otro siman tambe nos tin planiá pa hasi entrega di e pakete di premio na e felis ganadó dje kampaña di EXTRA relashoná ku Festival di Tumba…
Nos tei move, disfrutá di bo djasabra, aweró nos ta topa den Festival Center i kòrda ku si bo ta bebe, no stür!…
Felis wikent!…
