KOLUMNA KARNAVAL

Un felis djárason …

Ayera nos a kometé un omishon na momentu ku nos a lubidá di pone Reinier Lijfrock den e lista di eks Rei di Tumbanan ku ta partisipando e aña aki…

Danki pa e reakshon di nos lektornan ku nos a tuma nota…

Kompositornan tambe ta hunga un ròl importante den Festival di Tumba…

Kompositornan ku a yega di gana e Festival i ku ta den kompetensia e aña aki ta 8…

Gregory Colina tin 4 komposishon, Darwin Gregg tin 4, Axel Pikero tin 2, Ike Jesurun tin 10 komposishon, Gibi Doran tin 2, Dibo Doran tin 1, Doña Elia tin 3, Oko Dap tin 2 i Farley Lourens tin 1 komposishon den kompetensia…

Ora bo sinta i analisá e listanan di inskripshon bo ta yega na yen informashon ku sigur ta di atenshon pa skibi…

E temanan ku ta keda toká den e diferente komposishonnan ta mustra un biaha mas kon kreativo nos kompositornan por ta…

Esaki ta demostrá ku e Festival tin hopi aña mas pa bai, pasó tema pa usa pa e festival sigur no ta kaba…

Sea ta algu ku ta na moda òf nan ta usa un palabra i duna e tumba un otro kontenido ku ta bolbe hala atenshon dje palabra…

Partisipashon na Festival di Tumba tin su gastunan i bo ta mira ku si e banda no prepará su mes bon pa krea fondo pa bai e festival no ta algu fásil pa bo partisipá…

Nos a yega di skibi kaba dje situashon ku lidernan di banda ta haña nan konfrontá kuné …

Gastunan ta haltu i ta un invershon un banda ta hasi pa bai partisipá…

Ora bo klasifiká pa final bo tin chèns di break even, pero esaki no tur biaha ta sigurá…

E tim di prekario a saka nan informashon i a pone dia 8 di febrüari komo fecha pa kuminsá harma stelazje kantu di ruta…

E lista di reglanan tambe a keda kompartí i awe bo por lesa esaki i tuma nota loke ku ta keda kontrolá ora bai wak bo stelazje harmá kantu di kaya…

AGKK a tene su reunion djadumingu último, nos ta pendiente pa tende di Henny kon a bai ku reunion i pa por risibí e lista ofisial di gruponan ku lo ta partisipando na e diferente marchanan…

Ma tuma nota tambe di e orarionan ku tin pa loke ta Marchanan…

E Marcha Hubenil lo sali 4 or di atardi tantu riba djadumingu komo e djaluna di despedida di Marcha Hubenil…

Riba fecha di despedida Hubenil lo tin tambe e despedida di Tiner ku lo sali 6 or for di Sta. Maria…

Ma mira un konteo finansiero ku a keda hasi pa un amante di jump in, kaminda nan a konta kuantu sèn tin mester pa bai tur jump in…

Esaki ta algu mas ku 700 florin, aserka mester konta e bistimentu, drechamentu di kabei, pela i tambe sèn pa gasta na kada evento si e no ta ‘all in’…

Tin hende ta hasié, otronan ta bai kasi tur i bo ta mira nan sea riba potrèt òf riba videonan di Hermanito…

Fundashon JAG ta pendiente pa un anochi di baluartenan kaminda lo duna un homenahe na tur e eks Reina, Prens i Pancho di Karnaval…

Den pasado, na okashon di selebrashon di 45 aña di Karnaval tambe esaki a keda organisá i ta momentunan úniko pa graba esaki pa warda komo parti di historia di Karnaval di Kòrsou…

Ma komprondé ku Sentro Komersial SAMBIL tambe ta pendiente pa habri un eksposishon di Festival di Tumba…

Lo eksponé mantel i korona di praktikamente tur Rei òf Reina di Tumba ku nan logra kolektá den e área di eksibishon ku resientemente a keda habri den Sambil…

Nos Tata di Tumba, Boy Dap su eksposishon lo ta den e ‘booth’ di TeleCuraçao nèt na e entrada prinsipal di Sambil, sobra Reinan lo ta den e área ku nos a splika…

Esaki tambe ta otro bon desishon i sigur ta algu di aploudí…

Nos tei move, pa mañan nos ta pendiente pa bini ku informashon relashoná ku e elekshonnan pa embahadornan di Karnaval…

Te mañan ku Dios ke!…

SHARE

LEAVE A REPLY