Un bon siman pa tur nos lektornan…
Kòrsou tin su embahadornan di Karnaval 2020 i pa awe tur focus lo ta pa Festival di Tumba…
Pabien na e embahadornan…
A keda demostrá ku si bo prepará bon pa bo presentashonnan na final di anochi bo ta resultá e ganadó i esei ta loke ku nos a mira wikènt ku ta tras di lomba…
Hopi reakshon riba retnan sosial riba resultadonan di sigur djabièrnè i djasabra…
Kada ken por tin nan pensamentu, pero un hurado a sinta i husga presentashon di e partisipantenan i saka un resultado i nos tin ku respetá esaki…
Ma tuma nota tambe di reakshon riba preguntanan ku a keda hasi djasabra anochi…
Un reakshon so mi tin, segun mi nan mester a hiba un kombersashon, awor ta a base di 1 pregunta ku mi hasi bu ku nos por sigui kombersá, pero si bo ta suak den e proyekto ku bo mester a prepará, ta bonochi paga lus…
Nos mester siña ku mester prepará bo mes bon pa partisipá na un elekshon …
‘Two thumbs up’ pa Giovanni i Nataly kendenan tabata e maestronan di seremonia djasabra anochi durante di Elekshon di Reina, Prens i Pancho Adulto…
Bon trabou!…
‘Hats off’ pa Scarlet Zalm, tante Scarlet a demostrá su profeshonalismo djadumingu atardi…
No ta wega pa 7 ora largu bo presentá i entretené e públiko di kua mayoria ta mucha ta un arte…
Televishon Direct a transmití tur tres elekshon i e mester duna nan un ‘pluimpje’ pa e transmishon…
Esnan ku no a logra yega sigur a disfrutá di un bon transmishon…
Ayera nos a disfrutá dje tradishonal ‘Dumingu di Tumba’…
E aña aki nos a bishita ensayo di Gentz, ONE, yega lat pa Highway Band, ERA, ICONS i por último nos a yega GIO na kas di Doble…
Esun di GIO nos no a haña chèns di por a skucha niun tumba…
Leo e pan ku karkó stobá a dal bon…
Mester wak un manera pa e kushina ei ta habri na mas okashon…
Na ensayo di ERA i tambe na ICONS tabatin masha hopi hende…
ICONS a ensayá na Deyo na Roi Santoe i parkermentu di outo a tuma lugá for di den kaya prinsipal di Roi Santoe abou…
E tarima den Festival Center a keda hopi bunita…
Ta un trabou impreshonante di parti di Massive pa produsí un tarima ku mi tin sigur ku lo kapta atenshon e aña aki atrobe…
Ma mira dje tantu ‘moving heads’, lusnan ku ta bira, ku ma disidí di puntra ta kiko tin na ekipo riba stage…
Jimmy a splika mi ku tin 72 ‘moving head’ di Chauvet professional i un total di 162 panel di LED pa forma tur e diferente screen nan di LED riba e stage…
Pa loke ta spiker nan tin 12 meyersound line array i 9 sub pa banda, pues bon ‘bass’ den e lugá…
Pa awe e promé anochi di Festival di Tumba tin 2 eks Rei di Tumba ku ta bai presentá…
Tin tres dama pa subi tarima awe nochi, Tela Sambo, Lady Lava i Jurella Nita…
Eksito na tur e partisipantenan pa awe nochi, manera Feco a indiká den e último konferensia di prensa di AMAK, pa awe nochi lo tin animashon musikal promé ku e promé banda presentá…
Nos ta topa aweró den Festival Center…
