Nos a yega djaweps i preparashonnan ta sigui tuma lugá…

Ensayonan di banda a kuminsá kue drive…

Pa mayan ta pendiente pa un ensayo general di Festival di Tumba Hubenil den Festival Center…

Di informashon ku mi a risibí di ámbos banda ta indiká ku ensayonan a kana bon…

Partisipantenan pa elekshon di embahadornan di Karnaval tambe ta trein…

Bo mes sa, yen sekresia tambe pa loke ta trata presentashon di talento i tambe spich…

Den pasado nos a yega di mira ku te asta e preparadonan ta planifiká te hasta kon show di lus riba tarima lo mester tuma lugá…

Nan ta warda e ensayo general pasa pa nan keda i huntu ku e tim di produkshon sinta prepará e show kompletu…

Tin preokupashon aki na Kòrsou pa loke ta trata e situashon di gruponan Hubenil i esnan pa Parada di Tiner…

Ayera nochi Radio Mas den e programa Fèfè tabatin tur grupo embolbí den e situashon di Parada di Tiner na mesa…

Nos por a sigui e deliberashonnan ku a tuma lugá pero loke sigur ta importante ta ku tur partner embolbí ke buska solushon pa e situashon…

Un situashon ku mester por mira adelantá ta esun kaminda tin tiki grupo ku a inskribí pa partisipá…

Si adelantá bo sa di e situashon lo bo traha riba dje pa logra tòg haña algun skol pa partisipá…

Den pasado esaki a yega di tuma lugá kaba, pero e punto mas importante den esaki ta komunikashon entre AGKK i e organisashon ku ta organisá Karnaval…

Ku skolnan e yudansa por tuma lugá i mester kordiná esaki…

Den e promé parti dje programa ayera nochi e parti di organisá eventonan pa rekoudá fondo pa grupo di karnaval di skol no ta bai fásil…

Nos ta komprondé esei i esaki mester ta un punto ku pa algun aña kaba tantu AGKK komo Fundashon JAG mester a pone komo prioridat pa yudansa yega na e gruponan…

No mester warda riba proyektonan manera e jump in di T’aki Tin ku ta un ku ta yuda gruponan tiner…

Mester evaluá for di e aña promé i yega na un formulá kon ta organisá aktividatnan pa rekoudá fondo pa yuda tur e gruponan, sigur esnan di skol ku bo sa ku tin problema pa rekoudá fondo bou dje reglanan ku e skolnan mester apstené e nan mes na dje…

Ta meskos ‘Louie Louie’ a yega na bisa na vários okashon ku bo mester evaluá loke gruponan ta bai presentá den e diferente marchanan…

Ora bo hasi e evaluashon aki, bo ta na altura di loke ta nesesidat di e gruponan i lo bo por duna nan sosten…

Hopi biaha un spònser ta hasi donashon na e organisashon ku ta organisá, pero esei no ta nifiká ku e gruponan ta risibí sosten for di esaki…

Preparashon pa e transmishon di EXTRA pa Inskripshon pa Festival di Tumba ta tumando lugá…

E promoshon ku ta hasiendo ta halando atenshon i tin yen hende den espektativa pa wak e Tertulia di Festival di Tumba…

Apart di esaki tin algun kos mas ku lo risibí atenshon djadumingu awor durante dje transmishon…

Pa mayan nos lo divulgá algun detayenan ku lo hasi e transmishon aun mas interesante…

Trabounan na Festival Center ta tumando lugá…

Nos a tuma nota ku e lugánan di parker a wòrdu drecha…

For di AMAK nos a komprondé ku e músikonan tambe lo tin un lugá di parker asigná pa nan kaminda nan ta mas serka di ‘back stage’, manera semper tabata nan deseo…

Organisadónan di Hak’e a anunsiá durante di nan rueda di prensa ku tin plan avansá pa otro aña organisá e promé edishon di Hak’e na Aruba…

Pa loke ta trata Hulanda nan tin e fecha di 24 di yüli 2020 komo fecha pa organisá e promé Hak’e di Ulanda den Ahoy na Amsterdam….

Aki bo ta mira e potensial ku e evento tin pa bira algu internashonal…

Na Ulanda e interes pa Festival di Tumba ta grandísimo, te ainda mi no a mira promoshon kaminda ta promové e transmishon na Ulanda…

Segun ma komprondé aña pasa e transmishon pa Ulanda i Internashonal a generá un bon montante pa AMAK, pues nan lo mester ta trahando riba esaki …

Ayera nochi un biaha mas Glenn Thomas a skor ku programa ‘Rumba pa Tumba’, bon ambiente i bo ta tuma nota ku rònt Kòrsou i tambe Boneiru ta sigui Glenn …

No papia mes di esnan na Ulanda ku ta lanta trempan pa disfrutá dje programa di Glenn…

Glenn a indiká ayera nochi ku lo e tin un programa spesial riba djadumingu 26 di yanüari, bispu di Festival di Tumba 2020…

Keda pendiente pa esaki…

Nos tei move, tabata un plaser pa un biaha mas produsí otro edishon di ‘Louie Louie’…

LAGA UN KOMENTARIO

Please enter your comment!
Please enter your name here