Siman a parti na dos, nos ta den rekta final pa loke ta trata selebrashon di Karnaval 2026…
Ma mira ayera nochi un “post” riba Facebook kaminda ta bisa ‘Rastaman pa e buska un tènt pa e bai drumi na Sede’…
Mi ta spera ku no ta problema tin aworakí atrobe ku gruponan ku no ta biniendo kla ku trahenan di karnaval…
Hom, ban spera ku no…
Ata na Aruba músikonan a logra kombens’é e organisashon tras di e festival di Soca ku mester hasi konteo di votonan di hurado atrobe…
Te ku ayera nochi lat e situashon tabata di atenshon, ounke tin algun músiko ku a indiká ku no opstante kiko e resultado ta pa nan ‘Lord Lally’ ta keda e Soca King…
For di un portal di notisia di Aruba nos por a komprondé ku na final dje anochi no tabatin un diskrepansia den e resultado final…
E ‘People’s Choice King Lord Lally’ a mantené su korona…
Al final, Lally mes t’esun…
Bandanan na Aruba a pidi ‘inzage’ i a risibí esaki, djei tur hende ayera a wak si enbèrdat a kita e puntuashon mas haltu i esun mas abou for di nan lista di puntuashon, esei tambe a sosodé…
Loke nos por a komprondé na final, ku no tabatin niun kambio sigur den e Top 3…
Spera ku awe durante di dia e músikonan òf Stichting Musica, enkargá ku organisá e festival duna nan komentario pa tur sobrá hende komprondé kiko tabata e motibu pa kual a reuní ku tur e 13 bandanan ku tabata den e final ayera tardi bai kue anochi…
Ounke nos ta den temporada di Karnaval, e situashon ayera nochi ku un balkon a kai riba klientenan ku tabata kome na un restorant situá den kurason di Pietermaai ta algu hopi fèrfelu…
E situashon aki tei pone ku instansianan gubernamental lo mester bai hasi kontrol di tur e edifisionan situá den Pietermaai pa wak si nan ta kumpli ku tur e eksigensianan di konstrukshon i seguridat pa evitá ku algu asin’aki por ripití…
Mi ta spera ku e dos víktimanan ku tabatin lo rekuperá lihé…
Spera e empresa tambe ta sigurá pa tipo di aksidentenan asin’aki, paso ku lo tin kaso di daño kontra di nan ta sigur…
By the way bon biní na Serbes Presidente ku a djòin nos página den e último dianan di Karnaval…
Nan tin nan tremendo kampaña kaminda bo por gana un outo…
Danki na nan tambe pa kere den e paginanan di Karnaval “DEN E BEMBE” di Korant EXTRA…
Bon tabata un plaser pa produsí otro edishon di ‘DEN E BEMBE’ su kolumna di Karnaval…
