Un felis djabièrnè pa tur nos lektornan…
Awe te dia, e gran final di Festival di Tumba 2026…
9 banda, 30 tumba, un festival center praktikamente ‘sold out’ i un kantidat sin presedente di hende na kas ta sigui e festival via di Tumba+…
Segun mi e aña aki ta un dje añanan ku e festival a dal un dje stapnan mas grandi pa loke ta trata promoshon, asistensia, branding partner i Tumba+ …
E festival a krese na interes loke ta masha importante pa kontinuashon/ eksistensia di e evento kultural mas grandi di Kòrsou…
Ayera AMAK a tene un rueda di prensa kaminda nan a duna basta informashon relashon ku e anochi final di Tumba 2026…
Pa awe porta ta habri for di mitar di 6, 5.30, pues sòru pa bo ta na ora …
Lo tin kòntròl riba esnan ku a hasi kustumber di reservá stul pa esnan ku ta yega mas lat…
E konferensia ta 6or i show ta start 7or di anochi…
AMAK ta spera ku e promé 3 bandanan pa nan ta presente pa 6or di atardi na Festival Center…
Segun planifikashon di e tim di produkshon, e festival ta kaba pa 3or di mardugá…
Presidente di Hurado Dr. Francis de Lanoy a indiká ayera nochi ku e kompetensia ta bastante pareu…
E kompetensia a bira mas fuerte pasó e músiko/ partisipante a adaptá su mes na e reglanan…
Pa awe segun Dr. de Lanoy e presentashon riba tarima lo tin ku demostrá e diferensia…
Ku e informashon aki bo ta yega na e konklushon ku e kompetensia ta hopi pèrtá i tur hende tin mesun chèns…
Gino Valeriaan a informá ku a sobra ménos ku 30 karchi di “red carpet” i mas o ménos 200 karchi general…
E karchinan di red carpet lo ta optenibel na e ofisina prinsipal di Tu y Yo riba Rooseveltweg…
Un punto ku tambe a risibí aklarashon ayera ta e interupshonnan ku a surgi durante di transmishon pa esnan ku a aboná Tumba+, e tim tékniko di e produkshon a duna splikashon i nan a anunsiá mesora ku a hasi e adaptashonnan nesesario pa evitá kualke situashon awe nochi durante transmishon…
Segun splikashon dje téknikonan e demanda a subi hopi i esaki a trese su retonan kuné…
Un situashon ku tabatin ku zonido tambe a keda remediá segun a keda informá…
Pa awe nochi, lo tin dos showtime, e promé lo ta e homenahe na Ike Jesurun ku lo tuma lugá despues di presentashon di banda # 5 ku ta Daiquiri Band…
E di dos showtime lo ta despues di presentashon di e último banda ONE Flavaz…
A anunsiá ku Kev lo ta e artista pa entretené pendiente resultado final…
Apart di Kev, e Reina di Tumba 2025 Jefdaney Manuela lo tuma despedida ku su presentashon…
AMAK a hasi un gesto na pueblo di Kòrsou ku e transmishon grátis di e final di Festival di Tumba via di TeleCuraçao i TvDirect…
Otro kos, Gobiernu a informá durante rueda di prensa ku tin tres kas ku lo mester wòrdu protehá debí ku tin chèns pa basha aden, ta resultá awor ku tin mas edifisio ku a wòrdu protehá kuminsando for di Plenchi Pieters Kwiers bai pariba…
Mi ta spera ku nan a hasi e kòntròl bon, pa evitá kualke situashon no deseá…
Bon den rekta final aki, tur klase di éksito na tur e kantantenan ku ta den kompetensia awe nochi…
Kòrda riba e punto masha importante pa awe nochi ku ta bos i entonashon, no laga adrenalina subi i pone ku bo tei grita fo’i tono te hasta kanta falsu…
Nos ta topa awe nochi den Festival Center…
Te mañan ku Dios ke !…
