WILLEMSTAD.- Kombate entre luchadó di gueria den region di Catatumbo, den nortost di Colombia, a kosta bida di 117 hende for di mitar di yanüari. Ademas, 650.000 hende a bira desplasá. Un organisashon di derecho humano a duna konosementu di esaki djamars último.
For di 16 di yanüari, tin kombate entre grupo ELN i Frente 33. Nan ta bringando pa kontrol di plantashon di koka. Den e zona ei tin un komèrsio aktivo hopi fuerte di kokaina, kaminda Colombia ta e prinsipal produktor mundial.
Debido na e kombate, Colombia a drenta den un di e krísis di seguridat mas grandi di e últimonan aña.
E movementu rebelde mas grandi, FARC, a firma un akuerdo di pas ku gobernashon Kolombiano den 2016 i for di esei a entrega arma. Frente 33 a separá for di FARC despues di esei. Aunke e akuerdo a trese un mehorá den seguridat, tin área den e pais ku ainda ta bou di kontrol di grupo ilegal, manera Frente 33 i ELN. E organisashon di derecho humano ta akusá ELN di “bai kas pa kas” pa mata hende ku ta asosiá ku Frente 33.
