BASE AL-OMAR, SIRIA, AP.- Mas di 300 miembro di grupo Estado Islámiko, establesé den un zona na ost di Siria ta ninga di entregá na forsanan respaldá pa Merka i ta purbando di negoshá un salida.
E ekstremistanan ta den e pueblo Baghouz, i nan ta skonde entre sivilnan ku nan a tuma komo rehen. E táktika aki ta retrasá e deklarashon di ‘fin di kalifato’ pa EI. Forsa Demokrátiko Sirio kier a hasi e deklarashon aki siman pasá.
Segun indikashon di un persona ku ta na altura di e negosiashonnan, e ekstremistanan ta pidi pa forma un ruta direkshon di nortoksidental di Idlib, kual ainda ta wòrdu kontrolá pa rebeldenan. Opservatorio Sirio pa derechi Humano, un grupo aktivista ku ta monitòr e guera sivil na Siria, a señalá di a rechasá e solisitut di Estado Islámiko pa e grupo wòrdu evakuá. Estado Islámiko a laga 10 kombatiente di FDS den libertat djadumingu. No ta kla si e grupo lo haña algu a kambio di esaki.
FDS i e koalishon enkabesá pa Merka ta kombatiendo Estado Islámiko den e region desde sèptèmber.
Por lo ménos 62 persona a muri durante último simannan, spesialmente pa desnutrishon, despues di a skapa for di e teritorio kontrolá pa Estado Islámiko, segun indikashon di Komité Internashonal di Reskate. E bosero Paul Donohoe a bisa ku dos terser parti tabata mucha mas chikitu ku 1 aña.
