BEIRUT, AP.- Kombatientenan sirio respaldá pa Merka a reanudá nan ofensivo kontra Estado Islámiko djadumingu, riba e último teritorionan kontrolá pa ekstremistanan na ost di Siria.
Forsa Demokrátiko Sirio a informá ku e desishon di reanudá e kombatenan a tuma lugá despues ku Turkia a menasá e forsanan kurdo pa redusí esaki debí na aktividatnan diplomátiko.
FDS a informá na final di òktober ku lo suspendé su kampaña kontra Estado Islámiko temporalmente den provinsia oriental di Deir el-Zour, akusando Ankara di pone su esfuersonan na peliger.
E grupo a bisa ku e ophetivo di reanudá e operashon ta pa “traha riba e derota final di Daesh”. Daesh ta e akrónimo árabe pa referí na e grupo ekstremista.
E gobièrnu turko ta konsiderá FDS komo un menasa terorista i un ekstenshon di rebeldenan kurdo den Turkia. E sosten di Merka na forsanan kurso a resultá den un tenshon fuerte entre Washington i Ankara.
Turkia a bisa ku su forsanan militar a bombardiá posishonnan kurdo ku a krusa e frontera di Siria, na ost di riu Eufrates.
Desde ku FDS suspendé e operashonnan, Estado Islámiko a lansa vários ofensivo ku a laga vários kombatiente respaldá pa Merka morto òf heridá.