GINEBRA, AP. – E intentonan di kombate entre forsanan di gobièrnu i Siria i rebeldenan den Alepo a kòrta tránsito por kompletu riba e úniko kaminda pa entrega humanitario den e parti di siudat kontrolá pa insurgentenan. Asina un bosero di Nashon Uní a indiká. E karetera Castello, konsiderá komo e úniko kaminda pa drenta i sali di Alepo “no tabata transitabel” desde e hostilidatnan entre ámbos banda ku a bira mas grave siman pasá. Asina Alessandra Velucci a informá djamars.
Nashon Uní ta kalkulá ku 300.000 persona ta dependé di e kaminda, kual ta permití e fluho di suministro, vienes i sivil, segun Vellucci. E entidat ta sigui risibí “informenan preokupante di bombardeonan aéreo i atakenan den zonanan sivil di ost i wèst di Alepo”, asina el a agregá. E bosero a pidi ámbos banda ku ta protehá sivilnan i pa fasilitá akseso i yudansa humanitario.
E minister di asuntunan eksterior ruso Serguei Lavrov a ekspresá su inkietut ku e persona di Nashon Uní, asigná na Siria, ta ” evitando su responsabilidatnan” di reuní e negosiashonnan di pas.
Lavrov a bisa ku e diplomátiko, Staffan de Mistura, ta wardando pa Washington i Moscow yega na un akuerdo tokante un transishon polítiko promé ku nan bolbe kuminsá e negosiashonnan entre gobièrnu sirio i oposishon, kual a kolèps den aprel.
