Kombersá ku bo yu pa amplia su konosementu di palabra

606

Nos enseñansa tin diferente nivel. Pa tur mucha, ni maske kua nan limitashon ta, tin oportunidat pa nan. Pa e mucha ku ta difísil pa siña tambe tin posibilidat. I p’esei awe nos ke mustra kiko tur M.C. Piar school ta hasi i den e kuadro aki Wendell Isidora komo kabes di e skol a duna nos e detayenan.

 

E diferensia MLK i skol fundeshi

M.C. Piar school ta un MLK school, un skol di hasi pa muchanan ku ta traha mas ku nan man. E ta un skol di hasi pero huntu kuné siña. I banda di esei nan ta haña idioma, sòm i orientashon mundial. E ta sosodé di un forma mas práktiko posibel. E diferensia entre un MLK i un skol di fundeshi normal segun sr. Isidora ta unu basta grandi. Na un MLK e mucha ta haña e lèsnan práktiko i na un skol di fundeshi ta teoria so. Ku lès di práktika Wendell a splika ku nan ta haña lès di kushiná, plantamentu, kuido di bestia, mantenshon di kurá, banda di idioma i matemátika. M.C. Piar school no ta asina grandi pero tin 82 alumno. Pero intenshon no ta pa e bira mas grandi sino e ta duna indikashon ku tin un problema den komunidat. Otro diferensia ku Wendell Isidora a menshoná ku tin entre un MLK i skol di fundeshi ta e nivel di inteligensia di e alumnonan. E alumnonan na MLK tin un nivel di inteligensia di 70 pa 79 i esnan di skol di fundeshi ta den kareda di 100.

 

Atmishon na MLK

Isidora a splika nos kiko tin di sosodé pa atmishon di un mucha na un skol MLK den e kaso aki M.C. Piar school. El a bisa ku te ku aña pasá pa un mucha drenta un MLK e mayor tin di bai sikólogo kuné pa hasi tèst di inteligensia pa wak su nivel i a base di e resultado ei ta determiná kua tipo di skol spesial e tin di bai. Si e nivel di inteligensia ta entre 70 i 79 e ta bai un MLK. Den e aña aki e kos a kambia i aktualmente tin na Kòrsou tim un komishon ku ta wak kiko tur e skol di fundeshi a hasi pa yuda e mucha i kaminda ripará ku por no por mas na un skol di fundeshi, e ora ei e komishon ta wak kua skol spesial ta pas mihó ku e alumno. Esaki ta algu nobo segun kabes di skol Wendell Isidora.

Prosesá mas poko poko

Na M.C. Piar school e mucha di mas yòn tin 5 aña i esun di mas grandi tin 14 aña pa asina nan por sigui pa skol avansá (13 aña i 10 luna). Teniendo na kuenta ku ta muchanan ku difikultat pa siña, kon fásil ta pa atendé ku nan na skol. Mener Isidora a splika nos ku si komprondé e mucha, e ta bai fásil. E difikultat ta ku ora mira nan no ta muchanan desabilitá. Nan tin 10 dede, 2 wowo, 2 orea esta ta manera kualke mucha. Ta nan manera kon nan ta prosesá informashon, kon nan ta komuniká, kon nan ta anda ku nan emoshonnan, esei ta trese e difikultat. Mester trata na komprondé e mucha. Ta alumnonan ku ora hiba kombersashon ku nan. Nan ta bisa ku nan a komprondé, òf nan ta papia pero ora tin di hasi e tarea ku duna nan, nan ta brua e kos. Por ehèmpel si e bisa e alumno “e saku di shushi aki sak’é di e kantor, mar’é i bai bent’e den e kliko i bin bèk, i na kaminda pasa serka tal yùfrou hiba rospondi. E mucha ta kue e saku di shushi i yega te na e kliko i bin bèk i puntra kiko e tin di hasi”. Por ripará ku a duna e mucha hopi tarea tras di otro. Pero tin tambe ku duna e mucha un rospondi chikí i tòg no por hiba e rospondi ei. I ora wak ta un mucha grandi i bo por rabia pasobra e mucha no ta skucha, pero esei no ta e kos. E mucha ta prosesá mas poko poko i ta mihó skibié i dun’é e papel bai kuné.

 

Dil ku emoshon

Mester tin hopi pasenshi i ora e mucha rabia no mester tuma e kosnan personal, segun e kabes di M.C Piar school. Tin bia sinta kombersá ku e mucha i duna nan otro eskoho ora nan tin e emoshon ei kon pa dil mihó kuné. Tin bia ta otro forma pa dil kuné e mucha no sa, segun Isidora.

“Zorggroep”

M.C. Piar school tin solamente 6 klas ku ta tuma máksimo 16 alumno ku e maestro. For di aña pasá a kuminsá ku un sorto di pilot pa wak kon ta bai esei ta un zorggroep. Un grupo pa muchanan ku mester di guia mas intensivo. E aña aki tin dos di e klasnan ei i den e klas ei tin solamente 7 mucha ku 1 maestro i un asistente. Ta trata di muchanan ku mester di mas atenshon debí na nan komportashon. Otro aña lo ta ful MLK bèk i ta tuma 16 mucha pa klas ku un total di 6 klas.

 

Bèrgwensa si òf no

Wendell Isidora awor a kumpli 2 aña komo kabes di M.C Piar school. Tratando ku e mucha di MLK i tirando un bista kon e eksperensia ta ku e mayor, si esaki tin bèrgwensa ku su yu ta bai un skol asina aki, e kabes di skol a bisa Djasabra ku e bèrgwensa tei serka mayornan ku a pone nan yu na un MLK school na edat mas grandi. E mucha ku a keda skol di fundeshi te grupo 6 i 7, nan ta bai einan ku edat mas grandi i hopi bia nan tin bèrgwensa ora ta papia ku nan amigunan pafó di skol. Den kurá di skol mes komo tin asina tantu kos di hasi e mucha ta haña e skol masha dushi mes. Pafó di skol, den nan amigunan, einan tin poko bèrgwensa. Pa loke ta trata mayornan Isidora a ripará ku masha tiki mayor tin bèrgwensa pero nèt kontrali pasobra nan ta kontentu ku nan yu tin skol i tin otronan ku no ta konsiente kiko ta sosodé na skol pero simplemente e yu ta bai skol.

Papia hopi ku e yu

E mucha ku ta bishitá un MLK school ta pasobra su grado di inteligensia ta poko abou. Por papia di un falta di e mayor ku e yu ta asina. Riba e pregunta aki Wendell Isidora a splika nos ku esei si no por bisa direktamente. Den e tèst ku sikólogo ta hasi pa determiná e nivel di inteligensia, un parti tin di aber ku e konosementu di palabra i esei si ta algu ku por hasi hopi na dje. En bes di yama tur atributo kos, duna nan un nòmber i papia i kombersá mas ku e yu. Asina bo ta amplia su konosementu di palabra. Pero por lo demas no por bisa ku ta e mayor a hasi algu robes ku e yu su inteligensia ta abou.

 

Un dia na M.C. Piar school

Wendell Isidora a laga nos sinti kiko ta pasa riba un dia na M.C. Piar school. El a bisa ku skol ta kuminsá mitar di 8 i e muchanan ta yega for di tempran, maestronan ta kana riba plenchi. E komo kabes di skol semper ta pafó. Ora bèl bati e muchanan ta bai nan klas. E promé 15 minüt ta kaminda e maestro ta konektá ku e  mucha den formashon sosial. Durante formashon sosial tin un grupo di alumno ku ta pasa tuma bestelling di pan pa mira kua mucha ke kome pan mainta i nan mes ta bai kushina i drecha pa tur mucha ku a  bestèl, hinka den un trònchi pa kada mucha i ta partié na e klasnan. Banda di esei kada klas tin kanika di te i esun ku tin turno pa yena te ta bai kamber di kòfi i ta yena e kanika ku te fresku i partié den e klasnan. Mayoria bia ta e yerba ku nan mes a planta ta usa pa traha te. E formashon sosial ta tuma lugá den un forma ameno kaminda e mucha ta bebe su yerba kome su pan i despues di 15 minüt bèl ta bati i e ta bai nivel di lesa. Kada mucha sa su nivel. Esun ku a drecha pan ta ‘ruim op’ tur kos i kushina ta limpi bèk i nan tambe ta bai nivel di lesa. Despues bèl ta bolbe bati, nan ta bai nivel di sòm, despues tin pouze. Despues di pouze e lèsnan práktiko ta kuminsá. Tin grupo ta bai lès di kushiná, otro mantenshon di kurá, gemnastik, kuido di bestia, kada grupo sa kiko nan tin di bai hasi. Tin lès ta kaminda maestro mes ta guia i otro momentu ta e maestro di e materia ei por ehèmpel den kushina, e kòki tei. E mantenshon di kurá ta ku e maestro, gemnastik ta ku un persona di FDDK. Tambe tin muzik, drama i baile ku nan ta haña serka dosentenan.

 

Deskubrí su talento

Na M.C Piar school nan ta traha pa e mucha deskubrí su talento i nan ke desaroyá esei lo máksimo posibel. I p’esei tin e parti di baile, drama pa e muchanan. Tambe ta guia e mucha di kiko ya bon i malu i p’esei tin di tuma tempu pa splika e muchanan dikon sierto eskoho i asina hasi e mucha un tiki mas konsiente. Esei ta pone ku hopi lès ta keda ripití pa asina e mucha mes por kustumbrá kuné i hasié.

 

No ta pasa prueba

Otro diferensia ku skol di fundeshi kaminda ta papia di grupo un te ku 8, na M.C. Piar school ta papia di M1 te ku M6. M1 ta e muchanan mas hóben di 5 pa 8 aña, despues M2 ta 8 pa 9, esta a base di nan edat nan ta bai un grupo. Nan ta keda na e skol te 13 aña i 10 luna i despues ta pasa pa AGO. E mucha di M.C. Piar school no ta pasa un EFO toest. Wendell Isidora ta spera ku den futuro lo yega na un prueba ku e mucha ta traha na final pa asina traha mas dirigí. Te ku ainda ta aña e mucha ta hasi i dependé su edat e ta bai e siguiente grupo i no ta wak loke e mucha por òf no. E mucha no por bai un VSBO òf HAVO pasobra nan no a pasa un prueba i a base nan nivel di inteligensia, ta AGO nan ta bai.

 

Saka lo máksimo di e mucha

Nan komo dirigente di skol i maestro mester ta mas skèrpi riba e alumno si ke saka lo máksimo. Na momentu ku ripará ku e mucha por mas, ta e momentu i deber di e maestro pa saka lo máksimo di dje pa aserka e mayor pa mira si por hasi un tèst di nobo pa asina e por sigui bai. No teme e mucha na e skol MLK djis pasobra e mucha ta skor bon. Si e mucha por muchu mas pa loke ta teoria ta bon pa laga tèst e mucha i kisas e por bai un LOM school. Ku esaki e kabes di skol a bisa ku kisas ora e mucha a traha su tèst di inteligensia, kisas mayornan tabata den divorsio i e tin influensia riba e mucha, meskos ku e mucha por tabata wòrdu tenta i ora el a yega e skol MLK el a sintié mas konfortabel, e tin ánimo pa siña i ora e traha e prueba bo ta ripará ku tin un kambio i asina por lag’é drenta un LOM school. Mas lihé detektá esei mas mihó pa e alumno pe adaptá na e nivel di LOM pasobra e diferensia di materia ta muchu grandi. Na LOM si e mucha por bai VSBO òf HAVO pasobra ei si ta pasa e EFO toest.

Duna mas informashon

Wendell Isidora ta kere ku mester bin mas informashon na komunidat di kiko ta un skol MLK. Tambe pa dosentenan kiko ta e forma adekuá pa anda ku muchanan di MLK, kiko ta e forma adekuá pa traha ku nan pasobra komo maestro ta un manera hopi distinto pa traha ku mucha di MLK. Mester laga buki lòs i usa e informashon den e buki pa pas’é na e mucha di forma mas práktiko. Por ehèmpel si ta duna sòm no mester di buki pa por siña konta, pero por hasié ku wega tambe.

Mayornan mas envolví

Tambe ta purba envolví mayornan mas tantu posibel den tur loke e muchanan ta hasi. Tin bia por sinti ku e mayor tin manera bèrgwensa pero nan ta sigui yama e mayornan pa nan por tei na loke e muchanan ta hasi. I kada mayor ku bin nan ta malkri’é i pa e por bai konta e otronan kon dushi el a pasa i asina tiki tiki mas ta bini. Te ainda Isidora a bisa no ta e kantidat ku e ta deseá. Mas abou e nivel di inteligensia di e alumno ta ménos involukrá e mayornan ta. Kisas ta bèrgwensa pero mayornan tin nan trabounan ku nan tin di hasi i komo tal no tin masha tempu pasobra nan no ta mira e importansia di ta envolví ku skol di su yu. Na M.C. Piar school nan ta fleksibel i ta pone aktividat mainta i atardi pa por haña mayornan na skol.

 

 

 

 

 

 

 

 

LAGA UN KOMENTARIO

Please enter your comment!
Please enter your name here