Kansier kubano Bruno Rodriguez-Parrilla.
LA HABANA, Cuba (AFP).- Gobièrnu di Cuba ayera a duna di konosé ku lunanan di negosiashon ku Merka no ta mustra ningun avanse. “E kòmbersashonnan entre gobièrnunan di Cuba i Merka no ta mustra progreso”, segun e kansier kubano Rodriguez, ounke el a agregá ku, “apesar di tur kos, La Habana ta sigui ta dispuesto pa dialogá i yega na solushon pasífiko riba e diferensianan di opinion ku Washington”.
E relashonnan entre La Habana i Washington a bira tenso for di yanüari último, ora ku Merka a disidí pa un blokeo petrolero p’e isla i sanshonnan nobo kontra di entidatnan i dirigentenan kubano.
Outoridatnan merikano tambe a akusá e eks presidente Raul Castro pa e tumbamentu den 1996 di dos avioneta di un organisashon anticastrista ku sede na Miami. Apesar di eseinan, e dos gobièrnunan ta bisa di ta mantené kontaktonan diplomatiko.
E hefe di diplomasia kubano a anunsiá di a solisitá na Asamblea General di Nashonnan Uni un debate riba e sanshonnan norteamerikano. E debate mester tuma lugá dia 7 di yüli.
E dia ei “Cuba lo denunsiá e akshonnan agresivo di gobièrnu di Merka kontra di nos pais, ku ta inkluí e menasa di agreshon militar dirèkt”, segun Rodriguez a bisa. “Ta trata di un situashon urgente pasobra e agreshon di gobièrnu di Merka kontra di Cuba ta tumando lugá i ta intensifiká”, segun el a agregá.
