MOSCOW, AP.- E asesor di seguridat nashonal merikano John Bolton a mantené kombersashon ku funshonarionan ruso, despues ku presidente Donald Trump a anunsiá ku Merka lo retirá di un trato históriko di limitashon di armanan nuklear.
Kremlin a ekspresá su frustrashon ku e anunsio di Trump ku Merka lo bandoná e Tratado di Forsa Nuklear di Alkanse Intermedio firma na 1987.
Dmitry Peskov, bosero di presidente ruso Vladimir Putin, a atvertí ku e retiro di Merka di e pakto lo “kombertí mundu den e lugá mas peligroso”.
El a agregá ku Rusia lo mester tuma medidanan pa “restourá e balanse” si Merka opta pa sali.
Trump ta indiká ku Rusia a violá e prohibishon di poseé, fábrika òf ehekutá ehersisionan misil nuklear ku alkanse di entre 500 i 5.500 kilometer.
Peskov a afirmá ku Moscow no a violá e tratado.
“Nos ta ninga e afirmashon ku Rusia a violá tratado INF”, asina el a bisa.
Bolton a reuní ku e presidente di Konseho di Seguridat, Nikolai Patrushev, i nan a kombersá tokante un variedat amplio di tema ku a inkluí akuerdonan di kontrol di arma, Siria, Iran, Norkorea i e lucha kontra terorismo.
