Komo hóben di 19 aña, na edat hopi yòn Barry Irausquin a kuminsá profundisá su mes den kuminda Vegan. E ta splika nos kiko ta ser Vegan i mas ku tur kos e diferensia entre Vegan i Vegetariano i ki e kumindanan aki por hasi pa nos ku ke tene diet.

Dikon el a bira Vegan; “Tin hopi konsekuensia ku ta bin ora bo kome karni i tur otro produkto ku ta bin di bestia. E impakto ku e tin riba nos medio ambiente, bestianan ku ta sufri masha hopi i e konsekuensia riba salú di hende mes. E konsekuensianan ei no ta nesesario pasobra awor aki supermerkadonan tin tur opshon pa skohe pa salú i pa medio ambiente. Ke men no tin motibu pa no skohe pa bai den un direkshon di mas salu i pa kuida nos medio ambiente”, Barry a bisa ku firmesa.

 

Hasi bo investigashon…

 

Barry a studia riba su mes pa el a yega te kaminda e ta awe komo Vegan. El a bisa di ta google hopi, usando Internet, hasi investigashonnan pa e sa kiko ta bèrdat i no ta bèrdat pasobra tin hopi informashon ku ta konfliktivo ku otro. I p’esei ta bon pa kada hende mes hasi nan investigashon. Na novèmber di e aña aki Barry ta hasi 2 aña ku el a bai over na Vegan.

E diferensia entre vegan i vegetariano….

E vegan i e vegetariano tin un diferensia. Echo ta ku niun di dos no ta kome ni karni ni piská ni galiña. Pero den kaso di Vegan nan no ta kumpra niun produkto ku ta bini di bestia, ni lechi ni webu i asta den nan paña nan ta wak pa no tin nada di kueru di bestia. Nada nada ku ta bin di bestia siendo un vegetariano si ta kome webu i bebe lechi.

 

Paña ku no ta kontené nada di bestia….

 

Barry a pone énfasis riba e tipo di paña ku e ta bisti. Manera el a bisa e paña no mester tin nada di kueru di bestia. “No semper bo tin garantia ku bo ta kumpra un paña ku no tin nada di bestia den dje. Hopi bes mi ta puntra pero e hendenan mes no sa kiko tin den e paña. I p’esei mi no sa kumpra paña mashá i ora mi kumpra mi ta hasi un investigashon promé kua marka di paña por bisti komo vegan pa asina mi no paga pa hende ni bestia sufri”, Barry a splika.

 

Mi no ta lamentá….

I awor despues di tin kasi 2 aña di ta un Vegan Barry ta sinti e diferensia, spesial pa loke ta su salú. El a bisa ku ántes e tabata bira malu konstante. Bira ferkout hopi, su kurason tabata manera kima, pero masha tempu e no tin esei mas. Su energia ta mas haltu, e ta trein mas ku nunka. Nada ku e ta lamentá di a bira Vegan.

 

Vegan sin restrikshon….

 

Barry ta kushiná tur kuminda ku un hende por imaginá su mes, pero komo Vegan. I el a bisa ku  ta yega bastante fásil na su ingredientenan pa e kushiná aki na Kòrsou. E ta usa produktonan manera aros, bonchi i sierto produktonan manera keshi Vegan ku tambe ta haña fásil na Kòrsou meskos ku manteka i lechi.

 

Nos konosé desayuno, almuerso i sena, i tin asina tantu produkto vegan ku semper bo ta kome algu otro, segun Barry. Por ehèmpel mainta pan ku awakati òf papa, mèrdia aros ku bonchi òf  un burger, pizza, tur kos e por traha Vegan sin restrikshon. I pan tambe e ta kome pasobra por ehèmpel pan brùin hopi bia no ta trahá ku webu òf lechi i esei ta masha fásil. Semper e ta lesa su etikèt pa sa kiko tin den nan.

Kushiná komo hòbi…

 

Barry a kuminsá kushiná komo hòbi pero esnan ku a sa di esaki a kuminsá purba i awor Barry ta kushiná algun dia pa siman pa un grupo chikí di persona. E ta tene e kantidat chikí pa asina e por duna kalidat na kada un di su hendenan. Kada dia tin algu otro, masha poko Barry ta ripití un kuminda. E ta haña su inspirashon riba Youtube, Instagram i loke e mes ta mira e ta traha su mes rèspèt. Of tambe si ta algu ku e mes tabata gusta kome ántes, e ta bolbe trahé estilo vegan. Barry a bisa Djasabra ku e no ta hasi propaganda pero esun ku ta deseá por yam’é semper na 517-9105.

 

Pasaboka tambe…

 

Vegan no ta solamente kuminda pero tambe pasaboka esta dessert. Tur siman banda di e almuerso tin tambe pasabokanan ku e ta ofres’é. I tur su pasabokanan ta trahá “raw” esta kurú. Nos a purba e Oatmeal Cookie, brownie i hopi mas. I den hopi di e pasabokanan tin e dadel ku ta duna e produkto e suku natural.

 

Konstruí bo mes kuminda….

Kome Vegan ta dependé di kada hende segun Barry. Tin hende ta gusta hopi bonchi, tin otro hopi berdura, pero ta kuestion di simplemente eliminá e lechi i e webu i di mes e karni for di e kuminda i kome loke bo ta kere. Konstruí bo kuminda manera abo ta kere ta bon i djis remplasá e kos ku no ta vegan ku algu otro.

 

 

Pa aki 5 aña Barry ta kere ku e por tin un restorant pero sigur ta ku su bida lo ta full otro. Kisas e tin algu chikí pa bende ‘streetfood’ pero loke si ta sigur ta ku e lo sigui kushiná pasobra e ta gusta esei. Nunka e no a bai skol pa siña kushiná, pero a hasié riba su mes. Ora el a bira Vegan, konsentrando riba su salú, el a siña kushiná riba su mes. Siendo Vegan bo no ta limitá bo mes na kuminda pa kome, segun Barry a bisa Djasabra. Tempu el a kuminsá kushiná e ta saka potrèt òf filma i pone riba Instagram. Asina hendenan a kuminsá reakshoná i kier a purba su kuminda. El a kuminsá kushiná pa un, dos i tres persona i te awe e ta kushina pa mas.

 

Vegan no ta nifiká baha di peso…

 

Komiendo vegan no ta nifiká baha di peso.  No ta pasobra bo ta kome vegan bo ta baha di peso. Tin hopi kos ku ta ‘junkfood’ ku tambe ta vegan manera Oreo ta vegan. Por kome batata, aros pero e no ta nifiká ku e ta yuda baha di peso. Loke Barry ta rekomendá pa baha di peso ta kome kuminda den nan forma natural esta nada prosesá. Evitá suku artifisial i esei ta e mihó manera pa baha di peso.

Kambia pa salú tiki tiki….

 

Pa bo kome salú bo mester gusta kiko bo ta kome. Na Kòrsou hende ta gusta kos ku salu i sous i ta poko difísil pa kome Vegan. Pero purba kuminsá ku un kuminda  pa dia estilo Vegan i tiki tiki kambi’é i bai salú pa tòg bo ta keda kontentu ku loke bo ta gusta.

 

LAGA UN KOMENTARIO

Please enter your comment!
Please enter your name here