STRAATSBURG, FRANSIA (AFP).- E Komishon Europeo ku ta analisá un lei di amnistia pa e independistanan catalán lo evaluá si esaki ta afektá e estado di derechi di Spaña, segun e komisario europeo di Hustisia, kende apesar di esei a atmití ku ta un “asuntu interno” dje pais.

“E komishon ta mantené su posishon riba e asuntu di Cataluña. Ketu bai e ta un asuntu interno di Spaña, ku mester keda tratá segun nan konstitushon”, segun e komisario Didier Reynders durante un debate den e plenario di Parlamento Europeo.

Reynders a bisa ku e komishon “ta analisando e proyekto” di lei di amnistia, i ta spera pa kaba ku e trabou ei “na momento ku un teksto final keda adaptá pa e Parlamento spañó”.

Un akuerdo entre Partido Socialista Obrero Español (PSOE) i e partido independentista catalán Junt per Catalunya (JxCat) a habri porta pa un periodo nobo dje sosialista Pedro Sanchez komo hefe di gobièrnu di Spaña.

Pa e akuerdo ei, e partidonan o presentá na Parlamento spañó un lei di amnistia pa esnan ku tin di aber ku e deklarashon unilateral di independensia di Cataluná, un region den nortost di Spaña, den 2017.

E idea di un lei di amnistia a kousa disgustu na Spaña pa e denunsianan di su impakto den Estado di derechi i, komo tal, e plenario di Parlamento Europeo a organisá e debate.

Segun Reynders, “den último simannan, e Komishon a risibí vários karta i reklamo”, ku preokupashon si e proyekto di lei ta konforme e balornan fundamental di Union Europeo”.

Den e debate di Parlamento Europeo, e lider pa independensia catalán di 2017, Carlos Puigdemont, aktual euro diputado, no a hasi uso di palabra den e   seshon, pero den un mensahe riba e ret X el a tilda e debate di ta un “sirko”.

LAGA UN KOMENTARIO

Please enter your comment!
Please enter your name here