Na desèmber awor
WILLEMSTAD.- Tur miembro di e komishon fiho di Asuntunan di Reino i Relashonnan Interparlamentario lo biaha pa Den Haag Hulanda pa partisipá na e di 36 kongreso di InterExpo ku ta tuma lugá di 9 pa 11 di desèmber awor. E kongreso e aña aki ta den kuadro di 15 aña despues di 10-10-10, esta 15 aña ku a disolvé Antianan Hulandes.
Presidente di e komishon di Asuntunan di Reino, David Seferina (MFK) a bisa ku e komishon a trata e invitashon pa partisipá na e kongreso i ku tur aña parlamento sa partisipá ku un delegashon chikí. Na desèmber 2024 solamente 2 miembro, Zita Jesus-Leito i Quincy Girigorie a partisipá na e konferensia na Den Haag ku tabata den kuadro di 70 aña Statuto di Reino Hulandes. Konsekuensia tabata entre otro ku ámbos parlamentario no por a partisipá na reunion públiko di parlamento riba presupuesto 2025.
Pero e aña aki e embergadura di e konferensia i e tópiko ku ta trata, esta 15 aña despues di 10-10-10, segun Seferina ta motibu pa bai ku e komishon kompletu. E ta bisa ku durante e konferensia ta bai hasi un análisis di e 15 añanan tras di lomba ku diferente pènel di diskushon i partisipashon di instansianan públiko i representantenan di paisnan den Reino.
Tambe Seferina ta bisa ku e komishon lo hasi uso di e oportunidat pa sera konosí ku e parlamento hulandes nobo ku lo sinta despues di elekshon 29 di òktober awor. Esaki ta motibu ku e komishon ta proponé for di awor Komishon Sentral di parlamento disidí pa aseptá e invitashon pa asistí na InterExpo i alabes bishitá parlamento hulandes nobo. Esaki mirando ku tin ku traha sita tempran ku e parlamento nobo.
Riba proposishon di parlamentario Sheldry Osepa (PNP) Komishon Sentral a bai tambe di akuerdo ku si un miembro di e komishon fiho disidí ku e no ta bai InterExpo ku por remplas’é pa un otro miembro di e mesun frakshon. Miembronan di e komishon fiho ta David Seferina, Ramon Yung, Frensell Lourens, Maria Nita (tur MFK), Ruthmilda Larmonie-Cecilia (PNP), Quincy Girigorie (PAR) i Giselle Mc William (MAN-PIN). E konferensia di InterExpo lo ta e di 2 biahe den korto tempu pa e komishon di Asuntunan di Reino.
Fin di sèptèmber e reunion entre e 4 parlamentonan den Reino, Ipko ta riba agènda. Di parti Hulanda ta kontinuá ku organisashon di Ipko ku ta tuma lugá na Den Haag, apesar ku esaki lo ta djis promé ku e parlamento baha ku reseso pa elekshon na fin di òktober. Pa reunion di Ipko tambe ta e komishon di Asuntunan di Reino kompletu ta biaha pa Hulanda huntu ku presidente di parlamento i personal di griffie.
30 di mei awor tin un reunion na St. Maarten entre e presidentenan di parlamento di Kòrsou, Aruba i St. Maarten. Presidente di parlamento di Kòrsou, Fergino Brwownbill a haña komo instrukshon di parlamento pa durante e reunion tripartit na St. Maarten sondia si e otro parlamentonan ta haña ku tin sentido pa partisipá na e reunion di Ipko na sèptèmber awor mirando ku elekshon pa parlamento Hulandes ta tuma lugá djis despues di e Ipko i ku e chèns ta grandi ku e parlamento nobo lo no adoptá kualke palabrashon ku yega na dje durante di e Ipko di sèptèmber na Hulanda.
Foto:
…David Seferina…
