E manera ku na El Salvador nan ta “paketá” prezunan den e mega prizòn ku gobièrnu dje pais a konstruí.
CIUDAD DE GUATEMALA (AFP).- Un grupo di huristanan internashonal ayera a akusá e gobièrnu di presidente salvadoreño Nayib Bukele, di ta kometé “krímennan kontra di humanidat”, manera tortura i desaparishon, den su guera kontra di gèngnan. E ofensiva aki ta tuma lugá bou di un “estado di eksepshon” ku ta permití detenshonnan sin órden hudisial i ku den kasi kuater aña a hiba 90.000 persona prizòn, di kua ocho mil despues a keda liberá pa falta di prueba.
“Tin basenan rasonabel pa kere ku den kuadro dje maneho di eksepshon, a kometé krímennan”, segun e direktor pa Amérika Latina dje organisashon InterJust, Ignacio Jovtis. Un rapòrt di GIPES, ku ta un grupo internashonal di ekspertonan pa investigashon di violashonnan di derechi humano, formá pa huristanan internashonal, a konstatá kasonan di violashon di leinan internashonal -inkluso di muchanan- tortura, asesinato, desaparishon forsá, violensia seksual, persekushon i otro aktonan humano”, segun ta bisa den un komunikado.
Datonan optené di informenan ofisial i independiente, i di víktimanan, ta referí na 403 morto bou di kustodia estatal , inkluso kuater mucha, i 540 kaso di desaparishon fòrsá bou dje “estado di eksepshon”.
“No ta trata di kasonan aislá, sino di polítika den kua ta kometé krímennan na gran eskala na un manera sistemátiko”, segun Jose Guevara, spesialista den derechi humano i parti dje grupo ku a traha riba e reportahe.
E guera dje presidente salvadoreño Bukele kontra di gèngnan a redusí violensia te na un mínimo historia den El Salvador, i a konbertí e mandatario derechista den un di esnan mas popular di su pais di i di Amérika Latina. Pero su strategia, di kua e símbolo ta un prizòn mega pa miembronan di gèng, tambe ta keda kritiká pa motibu ku sospechosonan no ta keda husgá den sala di korte.
