WILLEMSTAD.- Djabièrnè último e komishon di Farándula di Kòrsou a reuní ku Minister Steven Martina, enkargá ku e kartera di Ekonomia.

‘DEN E BEMBE’ a sostené un kombersashon ku Rignald Maduro, bosero dje komishon kende a indiká ku e reunion a kana den bon esfera.

‘Minister ta riba mesun liña ku e komishon pa loke ta trata e situashon di farándula i ekonomia’, asina Rignald a kuminsá splika.

E komishon ta respetá e parti di salubridat, pero ta buskando forma pa por drei farándula di un forma responsabel. Ayera e komishon a kaba di aprobá un karta ku lo mester keda entregá awe na Minister Martina. E karta ta un protokòl ku a yega di duna Minister di Hustisia, pero awor a adaptá esaki pa e Minister di Ekonomia. E protokòl ta kontené puntonan kon si lo por drei farándula den un forma responsabel.

KLARIDAT

E komishon a pidi klaridat riba e ayudo ku músikonan tabata risibí di Gobièrnu, si esaki ta bai sigui. Nan a risibí e konfirmashon ku tin sèn poné pa sigur dos luna mas, pero ku tur músikonan ora di hasi petishon pa e ayudo mester duna informashon korekto. ‘Tin hopi hende ku no ta duna informashon korekto òf nan no ta bolbe ripití esaki, paso tur luna e situashon por kambia pa e músiko’, asina Rignald a konta ‘DEN E BEMBE’.

Minister i e komishon ta riba mesun liña pa loke ta trata por ehèmpel un músiko ku ta toka piano, dikon e no por toka den un restorant. E komishon a komprondé ku GMN ta buskando un alternativa.

Awe e protokòl lo keda entregá na Minister di Ekonomia i ta pendiente pa risibí un invitashon pa por reuní riba e puntonan presentá.

 

 

 

 

 

 

LAGA UN KOMENTARIO

Please enter your comment!
Please enter your name here