BOGOTA, COLOMBIA, AFP.- E Komité Nashonal di Paro na Colombia a anunsiá djamars ku lo suspendé protestanan kontra gobièrnu te ku 20 di yüli. E protestanan a inisiá riba 28 di aprel kontra presidente Ivan Duque.
“Nos lo interumpí e mobilisashonnan den e pais kompleto temporalmente”, segun indikashon di Fransisco Maltes, un di e boseronan di e organisashon ku no ta representá tur sektor malkontentu, durante un konferensia di prensa.
E Komité a organisá un konsierto pa 20 di yüli, i tambe pa Kongreso entrega “proyektonan di lei”, segun informashon di Maltes.
E organisashon a suspendé kombersashonnan ku tabata tene ku gobièrnu desde mei, sin logra yega na un akuerdo pa resolvé e krísis.
E manifestantenan a protesta den pleno pandemia di COVID-19 pa eksihí presidente Duque pa kambia kurso di su polítikanan, resolvé violensia polisial i krea un estado mas solidario pa enfrentá e pandemia, kual a hinka 42% di e pueblo di 50 mion habitante den pobresa.
Por lo ménos 61 persona a muri desde ku e protestanan a kuminsá. Dos persona ku a muri ta agente polisial.