POR MORESBY(AFP).- Ta poko probabel ku lo haña sobrebibiente dje mortal skùifmentu di tera na Papua New Guinea, ku a dera den kareda di 2.000 hende, segun a keda atvertí pa representante di Nashonnan Uní.

“No ta un mishon di reskate, ta un mishon di rekuperashon”, segun  Niels Kraaier, representante di Nashonnan Uní pa Infansia (UNICEF) pa e pais aki situá parti nort di Australia.

E sentro nashonal di desaster di Papua New Guinea ta teme ku mas di 2.000 persona a keda derá pa e skùifmentu di tera ku a tuma lugá dia 24 di mei.

E pueblo Yambali a keda kasi totalmente lastrá ora ku un parti dje seru Mungalo a bin abou den mardugá di djabièrnè  i a aplastá algun shen kas.

Trabounan di reskate a keda strobá na e sitio, ubiká den mondinan grandi dje pais, komo tambe pa pelea di tribunan ku ta hasi difísil pa por yega na e sitio dje suseso.

For di despues dje suseso, hendenan dje pueblo a bin ta koba  ku masha poko material, mas bien usando nan mannan i palu, ku speransa pa haña algun hende bibu.

Segun e atministrador dje provinsia, Sandis Tsaka, e tragedia ta sigui i “kada bes por skucha kon barankanan ta krak, komo si fuera ta bòm ta kai. Apesar di esaki, hopi dje lokalnan ta nenga na bandoná e sitio komo ku nan tin speransa di por haña nan famianan ku a disparsé.

Mas aleu ta kalkulá ku alrededor di 30.000 hende a keda aislá, ounke ku reservanan sufisiente pa e próksimo simannan.

LAGA UN KOMENTARIO

Please enter your comment!
Please enter your name here