Restunan mortal dje víktimanan di un atake brutal djadumingu último den e kapital haitiano Port-Au-Prince.
PORT-AU-PRINCE (AFP).- Den kareda di 40 persona a muri den un atake di parti di gènnan den Kenscoff, serka dje kapital di Haiti, segun un informe di AFP. E atake a tuma lugá djadumingu último den un misa, den un área spesialmente pa hendenan sin kas.
“Nos a konta den kareda di 40 kurpa. Ta sigui buska. Tin hende ku ta pèrdí”, segun Massillon Jean, alkalde di Kenscoff. Segun e outoridat, “tabata un anochi di teror” ku ademas a laga kantidat grandi di hende heridá miéntras ku a sekuestrá otronan.
E miembronan dje gènnan a drenta e área riba tereno i a kuminsá ehekutá vários persona”, segun el a agregá.
Haiti, e pais mas pober di Amérika, ku alrededor di 11 mion abitante, ta pasando un den un krisis prolongá, ku problema ekonómiko i falta di seguridat. E situashon a deteriorá di forma konsiderabel e último añanan, ku gennan ku ta mata hende, sekuestrá i violá otronan i ta reklutá muchanan.
E ofisina di Promé Minister (Alix Didier Fils Aimé), a ekspresá su “kompashon profundo” pa e víktimanan resien i nan famianan. Tambe gobièrnu a anunsiá di a manda refuerso pa restablesé seguridat den Kenscoff, situá den serunan dje área di Port-Au-Prince.
Den kareda di 1.5 mion haitiano a bandoná nan kas i bai biba na otro partinan dje pais, segun Organisashon Internashonal pa Migrashon ku a splika ku e atakenan no ta solamente den e kapital.
A forma un forsa polisial ku lo konta ku 5.500 polis i militar strañero, spesialmente pa Port-Au-Prince.
