Iva Coran; Mama periodista

Iva Coran ta sigur un mama ehemplar. I p’esei nos a invit’é pa kombersá ku nos di Djasabra riba su eksperensia komo mama. Den luna di mei nos ta selebrá dia di mama, pero Djasabra ta selebrá luna di mama. I ta den e kuadro aki nos programanan di e luna aki ta bai rondó di e tema di mama. Ki ehèmpel komo mama e persona ta pa su yunan, kon el a eduká nan i si el a hiba e mesun kriansa ku su mama. Den e kaso aki Iva Coran nos kolega di EXTRA. Iva tin dos yu muhé ku pe ta keda mucha semper.


Konosiendo Iva

 

Iva a bisa nos ku e ta e yu di mas chikí di su mama i tata. E ta e yu ku semper su mama a bisa “bo ta masha lawaaierig”. E palabra ei mi no ta saka for di mi kabes. Mi otro rumannan ta masha rustig”. Nan tabata 4 ruman di kual un hòmber i 3 muhé. Lamentablemente algun tempu pasá el a pèrdè su ruman hòmber. Iva ta bisa ku el a keda ketu bai esun di bochincha pero awor mas trankil tòg. Nan a keda kriá masha humilde den kas di mama ku tata. Su tata tabata toka konsekuentemente kasi e no tabata na kas. Iva ta kòrda ku ántes ora su tata bai afó pa toka, e ta keda sigur un luna sin ta na kas. Esaki a pone ku el a pasa hopi desèmber sin tata na kas. Su mama a keda kas kuida nan miéntras e tata tabata traha. Su tata tabata un hòmber masha strèn ounke nunka a sut’é. Iva a sigui su estudio promé na nivel di MBO pa siña hasi kabei pero despues a sigui pa HBO den lei. Iva ta konta un tiki mas di dje bisando ku el a haña su dos yunan siendo den kas di su mayornan. Ora su yunan tabatin 11 i 13 aña su tata a fayesé. E ta kòrda ku su tata tabata stima su yunan. Na 2014 su tata a fayesé ku tabata algu hopi duru. E ku su tata tabata su ‘partner in crime’, e tabata su role model. Su mama tabata mas ketu i asta tin hende ta puntr’é si e tin mama pasobra tur kaminda ta ku su tata. Su tata tabata paresido na Iva. Iva ta kòrda ku ora e bisti algu eskotá su mama ta bis’é pa e tapa su pechunan miéntras su tata semper tabata apoy’é.

 

Pèrdida di tur dos mayor mesun aña

Iva a pèrdè tur su dos mayornan den e mesun aña. Promé tabata su tata i algun luna despues su mama a kai dal kabes, keda bai atras te el a fayesé. Tabata un sla duru i Iva a keda para su so ku su yunan. Su mayornan no tabata dun’é chèns praktikamente pa e hasi nada ku su dos yunan. Su tata no tabata ke pa nan kushiná ni hasi nada. E tata tabata hasi kompra i kushiná e mes. Ora tur dos a fayesé, ata Iva awor. Ta e momentu ei el a sinti ku el a bira mama. E ta kòrda ku su tata tabata asta drecha pan pa su yunan bai skol i e siguiente siman ku nan a dera su tata, su yunan a bai skol sin pan pasobra e no a kòrda mes. E no tabata sa kon pa hasié. E tabatin yu si pero tabata yu di su mama i tata.

 

Kambio direpente

 

Na momentu ku su mama i tata a fayesé ta nèt gobièrnu a kai i e mester a buska otro trabou. Asina el a drenta prensa na 2014 trahando na Vigilante. Ounke promé ku esei el a traha na e korant Boletin kaminda el a siña konosé e trabou di korte i na Vigilante el a sigui ku e trabou tambe den korte. Banda di e sla di pèrdida di su mayornan, el a hañ’é ku e trabou den prensa di bai korte kaminda e ta sali su kas mainta, bai korte, sali korte bai sinta traha e artíkulonan. I esei e mester a kombiná ku su dos yunan. Esei a yud’é tòg pa e pasa riba e doló di su mama i tata. E ta kòrda ku ta na telefòn e tabata keda monitòr e yunan. Tabatin bia ku e yu chikí a hasi aña i Iva no tabatei. Si promé su mama i tata tabatei pa e yunan, awor ku Iva den prensa tabata e yunan so na kas, den momentunan di selebrashon tambe. Tabata kambionan grandi ku tin da ta pone Iva bai den outo su so i yora pasobra e no por a komprondé e kambionan ei den su bida i direpente. Trahando den prensa Iva a bin ripará ku no tin asina tantu hende muhé ta traha. Na EXTRA mes den redakshon ta tres hende muhé ta traha.  E bida ta unu ku si bo no ta kla pe, bo no por hasié. Bo tin di sakrifiká bo bida sosial i si bo tin yu, tambe sakrifiká bo yunan.

E tabata ke ta manera su mama

 

Iva a sigui konta ku komo su mama a lanta nan masha humilde i semper tabatei na kas, nunka su mama a bai fiesta òf sali aki i aya ni kas di bisiña. El a bisa ku ora e haña su yunan e tabata ke pa ta manera su mama. Pero nunka e lo por tabata asina pasobra manera su mama mes ta bisa, ku Iva ta gusta bochincha, e ta gusta fiesta, for di yòn el a bai kaya ounke ku hopi rèspèt esei a base di loke su tata i mama ta splik’é. Iva ta kòrda ku ora su ruman muhé tabatin yu i e yega kas mardugá tende yu ta yora, e tabata bisa den su mes ku e si lo no haña yu yòn asina. Konsekuentemente el a haña su promé yu ku 26 aña. E ta haña ku tabata nèt bon pasobra ya el a kaba di fiesta, el a kaba skol i tabata traha.

 

Protehá di mas

 

E ta konta mas aleu ku ora bo tin yu, tur kos ta kambia. E ta kòrda ku semper e tabatin amiganan ta bin kas serka dje, pero esei tambe a kuminsá kambia tiki tiki. E kier a dediká pa su yunan pasobra su mama a instruí Iva kon pa guia su yunan. E tabata sigui konseho di su mama ounke segun e e tabata hasié poko di mas. El a haña ku el a ‘overprotect’ su yunan. Esei ta pasobra bayendo kasonan di korte, e ta mira hopi kos ta pasa, kon plannan ta wòrdu trahá i esei a pone ku el a kuminsá protehá su yunan di mas, te ku awor aki e ta hasié. Iva su mama a eduk’é den un manera di prinsipio i moral. Su mama no tabata papia hopi i a base di e básiko ku el a haña e tabata forma su mes. E no a mira su mama i tata bebe ni huma i esei e ta te ainda. I ta esei ta loke Iva a siña su yunan tambe. Nunka nana mir’é bebe i huma. E yu mas grandi di 22 aña tin bia ta pidi un drinks i Iva tabata sulfurá pero e ta haña ku mihó e pidi esaki su dilanti i no ora e no tei.

 

Awor e ta sinti loke su mama tabata sinti

Siendo un hende ku ta bai korte i ta skibi kasonan di krímennan den tur sentido, Iva a bisa nos ku kos ku mas e ta teme ta atrako, violashon. Ta kosnan ku e ta mira kon troumatisá víktimanan ta keda. E ta mira kon e víktimanan ta tembla ora nan mira e kriminal. El a pasa den kasonan den korte kaminda e ta tende kon ta persiguí i vigilá hóbennan. I awor aki miéntras su yunan ta riba kaya e no ta drumi i masha remarkabel ta ku e si tabata ke tempu di su tempu pa su mama drumi i no keda ward’é lantá. Awor e ta mira ta kiko su mama a pasa aden. Su yu tambe ta bis’é pa e drumi pero e no por hasié miéntras su yunan no yega kas. I voral ora e mira i tende den korte kiko ta pasa, kon ta atraká hende.  E ta keda bisa su yunan pa nan wak bon riba kaya, kòrda wak den spil. E ta sinti ku e ta manera bira un paranoia ku ta kansa tin bia e mes. “Pero no por otro pasobra ta esei mi ta tende diariamente den korte”.  Iva a konta ku hopi kos ku su mama tabata bis’é, e ta sintié awor ku e tin su yunan. El a bisa e ta tene kuenta ku kos a kambia pero tòg tempu di su tempu kosnan tabata un tiki mas trankil kompará ku awor. Awendia e muchanan ta mas habri. Antes tur kos tabata skondí skondí. Iva ta konta ku e tambe a bai tras di de Tempel bai sunchi i e gainan yòn di e tempu ei tabata komprondé ku no por bai mas leu. Pero awendia e muchanan ta bai mas lihé i p’esei e ta purba papia mas tantu posibel. E ta konsiente ku tin kosnan ku su mama no tabata papia kuné i awor e ta pensa sierto tópikonan kon e ta hasi papi’é ku su yunan. I esei ta netamente kisas loke su mama tambe tabata sinti kisas. E no sa ta pa bèrgwensa pero tin tópiko e no sa kon pa papi’é ku su yunan. I p’esei awor e ta komprondé kiko su mama tambe a sinti i p’esei no tabata papia sierto tópiko ku nan.

 

No grita pero gana konfiansa

 

Riba e pregunta ku si Iva ta kere tin kos ku e ta kere ku si el a hasi otro, lo tabata otro tambe, el a konta Djasabra ku promé ku su tata a fayesé esaki a bis’é ku e ta haña ku Iva ta grita e muchanan hopi. Su tata a pidié pa no grita pero papia pasobra asina bo ta gana konfiansa. I el a eksperensiá un par di bia ku su yunan mes ta bis’é ku nan no a bis’é sierto kos pasobra sino e lo a grita. Un eksperensia ku e tin di esaki ta ku su yu mas chikí a sali na estado ku 18 aña  i Iva no tabata sa. Tabata un mucha masha ketu, no ta papia. Ora e yu a haña frei Iva a papia ku e frei i e sa ku e tin di habri man i a papia tur sistema ku e yu. El a mustra e yu riba e parti di skol, bida ta duru i bo mester di edukashon pa bo ta stabil pará den bida. Iva a splika su yunan di bida. Ora e yu tabatin 5 luna el a haña sa ku su yu ta na estado. Ora el a haña sa el a purba komprondé e yu. E yu a splik’é ku el a keda ketu pasobra mirando kon Iva ta, e tabatin miedu. I el a kòrda riba su tata pa ta un tiki mas habrí i no zundra. I esei ta loke e yu a bis’é ku tabata motibu dikon el a skonde pasobra e tabata sa ku e lo a desepshon’é. Komo mama Iva a bisa ku sigur bo ta desepshoná un tiki pasobra e yu ta yòn. Komo mama e ke pa su yu bai mas leu pasobra e sa kiko e trabou di mama ta. E mes tin di traha i no por keda i yuda su yu wak yu. Pero awe e por bisa ku e ta e oma di mas felis di un papi, esta un yu hòmber ku semper Iva tabata deseá pero ta dos yu muhé e tin. Awor e por bisa ku e tin un yu hòmber tambe, esta su nietu.

No wanta kos paden

Komo mama e ta kere ku bo no tin di wanta nada paden. Papia ora un kos no ta bon pero ora e ta bon tambe. E ta kere ku su mama tabata wanta kos paden i no tabata papia i esei e ta siña su yunan pa no hasi. Si bo tin algu di papia, papia. Iva a purba di papia mas tantu i e ke pa su yunan tambe hasié asina ku  nan yunan, ora nan tin esakinan.

 

Konseho pa eduká bo yu; bo ta papia di awe te mañan ku bo yu, ora e bai eifó ta su so ta eifó ta e kosnan ei ta bin bèk. E loke su mama i tata a hink’é den dje semper ta resaltá. Sòru pa bo tei semper pa bo yu, papia ku bo yu. Si komo mama bo tin di traha pa pone man riba mesa, buska moda pa sa ora e yu ta tristu. Kòrda ku bo ta mama promé ku bo ta muhé di un hòmber i promé ku bo ta trahadó. No skohe hende hòmber riba bo yunan. Semper wak pa bo ta mama promé i tei semper pa bo yu.

LAGA UN KOMENTARIO

Please enter your comment!
Please enter your name here