MERKA, AP.- E kompania Pacific Gas and Electric a anunsiá ku esaki tin planiá di deklará bankrut debí na e obligashonnan finansiero potensialmente enorme debí na su responsabilidat den e kandela di mondi mortal ku a asotá California den novèmber.
E direktor general di e kompania, Geisha Williams a renunsiá djadumingu. John Simon, asesor legal di e empresa desde 2017 lo remplas’é di forma interino.
Outoridat ta investigando si un di e ekiponan di e kompania ku ta proveé energia a kousa un kandela di mondi na nort di California, matando 86 persona i destruyendo 15.000 kas. Ademas, investigadónan estatal ta atribuí algun kandela den òktober 2017 na kabelnan di PG&E.
E deklarashon di bankrut ta representá “e úniko opshon viabel pa rekonosé responsabilidat di e kompania ku su akshonistanan”, segun Richard Kelly, hefe di e hunta direktivo di PG&E, den un deklarashon.
“E proseso ta permití pa nos traha ku siudadanonan den un foro supervisá pa korte pa asina kumpli ku nos responsabilidat i implementá kambionan apropiá”, asina Kelly a agregá.
Jacob Kilstein, analista di Argus Research, a bisa ku “esaki ta e kaida mas grandi di un empresa di servisio públiko ku mi a mira”.
