Kompetensia “Maramentu di Lensu” 2019 lo bai bira fenomenal

WILLEMSTAD.- E aña aki Maramentu di Lensu lo tuma lugá na Hòfi Fidel dia 31 mart próksimo ku un total di 21 partisipante.
Despues di dos dia di tayer pa asina por a haña tur klase di konosementu serka profeshonal nan den Mara Lensu, e 21 partisipantenan aki ta kla pa duna un tremendo espektákulo di kompetensia.
E tayernan a wòrdu duna dor di Doña Elia Isenia, sra. Mirugia Ignecia i sr. Shurendi Pieternella kaminda e partisipantenan por a hasi tur sorto di pregunta, pa asina amplia nan konosementu pa por kompetí dia 31 mart próksimo.
Lo bai tin 5 kategoria di Maramentu di Lensu, ku ta Lensu Original, Lensu Afrikano, Lensu MCB, Lensu UTS i Lensu Landsloterij.
Djadumingu, 31 mart e evento ta kuminsá for di 12 or di mèrdia ku benta di kuminda, pa 2 or lo kuminsá ku un show di apertura presentá pa grupo di baile D’Art, durante di showtime lo tin aktuashon di grupo Rítmiko SABLIKA i Grupo Kompèr. Entrada lo ta 3 florin pa persona.
E 21 partisipantenan pa e dia aki lo ta : Edtline Jops, Rosemarie Cijntje, Solange Bentura, Ayshenou Bentura, Magiola Barbara, Marla Borgschot, Christine Dania, Marvis Alberto, Lysette Pinedo, Percis Mercera, Helen Doran, Terrence Selassa, Lucilla Selassa, Monique Pengel, Admaida Selassa, Jeanahaira Dossett, Noe-Amy Maria, Syonara Maria, Eugenique Wilkens, Valeskka Felipa i Sandra Kook.
Fundashon Kultural Seú Kòrsou ta invitá hinter pueblo di Kòrsou pa bin apoyá i sostené nos partisipantenan den e Kompetensia Mara Lensu 2019, dia 31 mart for di 2 or di mèrdia te ku 8 or di anochi na Hòfi Fidel. “Kosecha propio, rikesa di un pais”

SHARE

LEAVE A REPLY