Komunidat Chines stima Kòrsou, pero kada un atrako ta di mas

WILLEMSTAD.- E komunidat Chines tin un trayektoria i historia di hopi dékada aki na Kòrsou, i e lo hasi tur loke ta posibel pa mantené e bon relashon di semper. Pero último añanan komersiantenan Chines ta ser hopi konfrontá ku kasonan di atrako, pero nan ta deseá di por sigui biba den ambiente mas sigur tantu pa nan bida komo pa esnan ku tin negoshi. Asina e Kònsùl General sr. Xue Shan a duna di konosé den un entrevista ku EXTRA e siman aki.

Segun sr. Shan, e promé general di Chinesnan ku a residensia na Kòrsou ta data for di prinsipio di siglo-20. I pa nan desendientenan i tambe esnan ku awe ta bini, nan ta stima e isla bunita, multi étniko i kultural aki di Kòrsou ku a bira sea nan pais di nasementu òf nan di dos kas.

Chinesnan bibá na Kòrsou ta forma un di e komunidatnan di mas grandi riba e isla. Hopi di nan tin nan propio negoshi chikí, manera e.o. restorant i minimarket. Nan negoshi ta kumpli ku e nesesidatnan den bida diario serka hendenan lokal i tambe ta kontribuí na nos ekonomia. Nan ta traha duru, segun sr. Shan, nan tin un bon relashon ku nos hendenan lokal i ta trata di integrá den e sosiedat lokal tambe.

Viktima di atrako

Di otro banda segun e Kònsùl, e komunidat Chines lokal ta hañ’é konfrontá i ta sufri hopi komo konsekuensia di atrakonan armá. Pa motibu di nan negoshi, hopi biaha nan ta bira víktima di atrakonan armá, i nan ta pèrdè plaka i pertenensianan personal sea den nan negoshi òf na kas, i asta tin di nan ta paga ku nan bida. Nan ta deseá di biba den un ambiente mas sigur pa nan bida i nan negoshi riba nos isla.

Yudansa di polis:

Pero e grupo aki tin un bon kontakto i entendimentu ku polis, i prueba di esei ta ku na momentu ku pidi asistensia di polis pa kualke kaso di atrako, e reakshon ta al instante i rápido.

Pero ofisialnan polisial a pone e komunidat Chines i spesialmente e komersiantenan na altura dje karakterístikanan di atrako i a duna sugerensianan riba kon pa fortifiká protekshon propio. Aparentemente kasonan di atrakonan a baha e último aña aki, pero kada un atrako ta unu di mas.

Segun sr. Shan, na nòmber di e komunidat Chines realmente e ta apresiá e sosten i yudansa ku nan por konta kuné di parti di gobièrnu i Kuerpo Polisial. Pero e ta kere ku e seguridat lo por mehorá ku yudansa di henter komunidat di Kòrsou.

SHARE

LEAVE A REPLY